ERMENI HABER AJANSI

Թուրքիայում գործազրկության իրավիճակը կտրուկ վատթարացել է՝ հասնելով վերջին տասնամյակի ամենաբարձր ցուցանիշներին։ Համաձայն «Հեղափոխական աշխատավորական արհմիությունների կոնֆեդերացիայի» հետազոտական կենտրոնի (DİSK-AR) վերջին զեկույցի՝ երկրում գործազրկության մակարդակը հասել է 28․8%-ի, իսկ իրական գործազուրկների թիվը մոտեցել է 12 միլիոնի սահմանին։

Պաշտոնական վիճակագրությունը ներկայացնում է էականորեն ավելի ցածր՝ 7․9% գործազրկության ցուցանիշ, սակայն մասնագետների պնդմամբ այս թիվը չի արտացոլում իրական պատկերը։ Զեկույցում նշվում է, որ 5․3 մլն մարդ, չնայած աշխատելու պատրաստակամությանը, հրաժարվել է աշխատանք փնտրել՝ ազդելով գործազրկության ընդհանուր ցուցանիշների վրա։

Հատկապես ընդգծված է կանանց շրջանում գործազրկության բարձր մակարդակը, որը հասնում է 38․2%-ի՝ տղամարդկանց 23․1%-ի համեմատ։ Սեռերի միջև տարբերությունը կազմում է ավելի քան 15 տոկոսային կետ, ինչը վկայում է աշխատաշուկայում կանանց հանդեպ շարունակվող խտրականության մասին։

Համաճարակից հետո երկրի տնտեսական վիճակի աստիճանական վատթարացումը հանգեցրել է նրան, որ գործազրկության թվերը վերադարձել են COVID-19-ի ճգնաժամի ժամանակաշրջանի մակարդակին։ Մասնագետները զգուշացնում են, որ գործազրկությունը դարձել է կառուցվածքային խնդիր Թուրքիայի տնտեսության համար։

Գործազուրկների միայն 14․9%-ն է կարողանում ստանալ գործազրկության նպաստ։ Պաշտոնական հաշվառված 2․8 միլիոն գործազուրկներից միայն 473 հազարին է հաջողվում օգտվել պետական աջակցությունից, մինչդեռ 2․3 միլիոն մարդ զրկված է այդ հնարավորությունից։

Թուրքիայում աշխատատեղերի խնդիրն ակնհայտ երևաց, երբ Քիլիս քաղաքում ընդամենը 3250 ժամանակավոր աշխատատեղերի համար հազարավոր թուրքեր երկար հերթեր կազմեցին զբաղվածության կենտրոնների առջև։ Ժամանակավոր աշխատանքի համար նման բարձր պահանջարկը լավագույնս ցուցադրում է երկրի աշխատաշուկայի ճգնաժամային իրավիճակը։