ERMENI HABER AJANSI

Թուրքիայի կողմից ահաբեկչական համարվող «Քուրդիստանի բանվորական կուսակցության» (ՔԲԿ - PKK) առաջնորդ-հիմնադիր Աբդուլլահ Օջալանի և ընդդիմության միջև ընթացող բանակցությունները Թուրքիայի հանրային քննարկումների օրակարգում են:

Հունվարի 23-ին մանրամասներ են հրապարակվել նախօրեին Օջալանի և ընդիմադիր «Ժողովուրդների հավասարություն և ժողովրդավարություն» (DEM) կուսակցության միջև կայացած արդեն 2-րդ հանդիպման վերաբերյալ:

Մասնավորապես թուրքական «Halk TV»-ում «Նոր առավոտ» ծրագրի հաղորդավար, լրագրող Իսմայիլ Քյուչյուքքայան հրապարակել է գործող պատգամորներից մեկի հետ թեմայի շուրջ ունեցած զրույցը:

Ըստ այդմ՝ Օջալանը «DEM»-ի պատվիրակությանն ասել է, որ այժմ ցանկանում  հրաժարվել ռազմական գործողություններից և առաջնորդվել խաղաղության ճանապարհով:

«30 տարի շարունակ ապրել եմ զենքը ձեռքիս, սակայն արդեն ցանկանում եմ ծառայել խաղաղությանը:

Մի՛ դատեք մինչ օրս եղած իմ արարքները: Ես այսուհետև ցանկանում այլ գործ կատարել: Ցանկանում եմ ծառայել խաղաղությանը»,-ասել է Օջալանը:

Լրագրողը նաև նշել է, որ չի կարող բացահայտել պատգամավորի անունը, ով իրեն փոխանցել է այս տեղեկությունը, սակայն կգնա այդ քայլին՝ երբ համապատասխան թույլտվությունն ունենա:

Հիշեցնենք, որ 2024-ի հոկտեմբերին Թուրքիայում իշխող «Արդարություն և զարգացում կուսակցության» (ԱԶԿ/AKP) հետ դաշինքի մեջ գտնվող աջ ծայրահեղական «Ազգայնական շարժում կուսակցության» առաջնորդ Դևլեթ Բահչելին հանդես էր եկել Թուրքիայի ազգային ժողովի ամբիոնից Օջալանին խոսք տրամադրելու առաջարկությամբ:

Առաջարկը կայանում էր նրանում, որ Օջալանն ինքն անձամբ պետք է զենքերը վայր դնելու կոչով դիմեր «PKK»-ին, ինչի արդյունքում էլ կլուծվեր տասնամյակներ ի վեր շարունակվող թուրք-քրդական խնդիրն ու վերջ կդրվեին ռազմական գործողություններին:

Այս նպատակով 2024-ի դեկտեմբերի 28-ին արդեն իսկ իրականացվել էր առաջին հանդիպումը, իսկ արդեն 2-րդը տեղի ունեցած հունվարի 22-ին:

Թուրքական մամուլում շրջանառվող որոշ լուրերի համաձայն՝ նախատեսվում է նաև 3-րդ հանդիպումը, որից հետո էլ հնարավոր է Օջալանը հանդես գա կամ «PKK»-ն լուծարելու, կամ զենքերը վայր դնելու և կամ Թուրքիայի տարածքում ռազմական գործողությունները դադարեցնելու մասին կոչով:

Թեմայի շուրջ զարգացումների վերաբերյալ գնահատականներ, ինչպես նաև առավել մանրամասն տեղեկություններ կարող եք գտնել թուրքագետ Էլեն Քոքչյանի «Արդյո՞ք Օջալանը PKK-ին կոչ կանի զենքերը վայր դնել» հոդվածում: