ERMENI HABER AJANSI

Թուրքիայում գործող «Հասարակական-քաղաքական դաշտի ուսումնասիրության» կենտրոնը նոր հետազոտություն է հրապարակել երկրում քաղաքական կուսակցությունների ունեցած վարկանշի վերաբերյալ։

Թուրքիայի 16 քաղաքներում 1563 մարդու մասնակցությամբ անցկացված սոցհետազոտությունը ցույց է տվել, որ հանրության շրջանում իշխող «Ժողովուրդ» դաշինքի անդամներ «Արդարություն և զարգացում» կուսակցության (ԱԶԿ-AKP) և «Ազգայնական շարժում» կուսակցության (ԱՇԿ-MHP) վարկանիշը աստիճանաբար նվազում է, իսկ քրդամետ «Ժողովուրդների դեմոկրատական» կուսակցությանը (ԺԴԿ-HDP)՝ աճում։

Այսպես, ի պատասխան այն հարցին, թե որ կուսակցությանն են ձայն տվել 2018 թվականի հունիսի 24-ի խորհրդարանական ընտրություններում՝ հարցվածների 39%-ն ասել է, որ ձայն է տվել ԱԶԿ-ին, 23․2%-ը՝ քեմալական «Ժողովրդահանրապետական» կուսակցությանը (ԺՀԿ-CHP), 11․4%-ը՝ ԺԴԿ-ին, 5․8%-ը՝ ԱՇԿ-ին, 10․6%-ը ազգայնական «Լավ» կուսակցությանը։

Մինչդեռ այն հարցին, թե որ կուսակցությանը ձայն կտաք, եթե այս կիրակի խորհրդարանական ընտրություններ անցկացվեն՝ հարցվածների 26.4%-ն է միայն պատասխանել, որ կքվեարկի Ռեջեփ Թայիփ Էրդողանի գլխավորած ԱԶԿ-ին։ 25․3%-ը նշել է, որ ձայն կտա ԺՀԿ-ին, 12․1%-ը՝ ԺԴԿ-ին, 4․2 %-ը՝ ԱՇԿ-ին, 13․8%-ը՝ «Լավ» կուսակցությանը։