ERMENI HABER AJANSI

«Սիրիայի դեմոկրատական ուժերի» գլխավոր հրամանատար ազգությամբ  քուրդ Մազլում Աբդին (Քոբանի), ով Թուրքիայում հայտարարված է որպես ահաբեկիչ, զգուշացում է արել թուրքական ղեկավարությանը: 

Մասնակցելով միջազգային հեռուստակոնֆերանսի՝ քուրդ հրամանատարը խոսել է Սիրիայի քրդաբնակ այն տարածքների մասին, որոնք ժամանակին գտնվում էին Սիրիայի քրդական ուժերի վերահսկողության տակ: Նրանց դեմ Թուրքիայի զինված ուժերը «ահաբեկչության դեմ պայքարի» պատրվակով մի քանի խոշոր ռազմական գործողություններ էին իրականացրել վերջին տարիներին։ Արդյունքում Սիրիայի հյուսիսում գտնվող մի շարք շրջաններ՝ այդ թվում Աֆրինը, անցել են Թուրքիայի զինված ուժերի և նրանց հետ ռազմական գործողություններին մասնակցած «Սիրիայի ազատ բանակ» խմբավորման վերահսկողության տակ: 

Քուրդ հրամանատարի խոսքով՝ Թուրքիայի զինված ուժերն արդեն մի քանի տարի օկուպացրած տարածքներում իրականացնում են ճնշումներ, անախադեպ բռնություններ, անօրինականություններ և կամայականություններ:

Նա նշել է, որ ԱՄՆ-ն ու ՌԴ-ն պետք է ունենան հստակ դիրքորոշում Թուրքիայի զավթողական քաղաքականության հարցում: 

«Մենք կազատագրենք Աֆրինն ու մյուս շրջանները. Աֆրինի ազատագրման հետաձգման հետ կապված որոշ պատճառներ կան, և մենք կփորձենք հաղթահարել դրանք։ Աֆրինի ազատագրման համար լուրջ ջանքեր են անհրաժեշտ»,-ասել է քուրդ հրամանատարը։

Տեղեկացնենք, որ Մազլում Քոբանին, ըստ թուրքական կողմի,  սերտ կապեր ունի ԱՄՆ-ի զինված ուժերի և ամերիկացի բարձրաստիճան պաշտոնյաների հետ: 

Դոնալդ Թրամփի նախագահության ժամանակ Թուրքիայի նախագահը նույնիսկ պահանջում էր ԱՄՆ-ից իրենց արտահանձնել քուրդ հրմանատարին, սակայն Վաշինգտոնը հրաժարվել էր կատարել Էրդողանի պահանջը: