ԱՄՆ պետքարտուղարի տեղակալը մեկնել է Թուրքիա

Քաղաքական13:21, 05 Ապրիլ 2022

ԱՄՆ պետքարտուղարի տեղակալը մեկնել է Թուրքիա

2022թ. ապրիլի 4-ին Անկարայում տեղի է ունեցել ԱՄՆ-ի պետքարտուղարiի տեղակալ Վիկտորյա Նուլանդի և Թուրքիայի փոխարտգործնախարար Սեդաթ Օնալի գլխավորած պատվիրակությունների հանդիպումը: Այս մասին հայտարարություն է տարածել Թուրքիայի արտգործնախարարությունը՝ տեղեկացնելով, որ մեկնարկել է Թուրքիա-ԱՄՆ ռազմավարական մեխանիզմի գործարկումը:

Նշվել է, որ հանդիպմանը քննարկվել է 2 երկրների ընդհանուր շահերն ընդգրկող հարցերի շրջանակ՝ ներառյալ տնտեսական և պաշտպանական ոլորտում համագործակցությունը, ահաբեկչության դեմ պայքարը, տարածաշրջանային և միջազգային հարցեր:

Կողմերը վերահաստատել են իրենց համատեղ հանձնառությունն Ուկրաինայի ինքնիշխանության և տարածքային ամբողջականության պահպանման հարցում: Բացի այդ Նուլանդը նշել է, որ ԱՄՆ-ն գոհունակությամբ է ընդունում Ուկրաինայի հարցում դիվանագիտական լուծում գտնելու համար Թուրքիայի գործադրած ջանքերը:

Հիշեցնենք, որ 2021թ. հոկտեմբերին Հռոմում տեղի էր ունեցել ԱՄՆ նախագահ Ջո Բայդենի և Թուրքիայի նախագահ Ռեջեփ Թայիփ Էրդողանի հանդիպումը:

Երկու երկրների ղեկավարները համաձայնություն էին ձեռք բերել երկկողմ հարաբերություններն էլ ավելի ամրապնդելու և զարգացնելու նպատակով համատեղ մեխանիզմ հիմնել:

Աղբյուր` Ermenihaber.am