ERMENI HABER AJANSI

Հունիսի 23-ին Ստամբուլում կայացած քաղաքապետի ընտրություններին ոչ պաշտոնական տվյալներով 54.03 % ձայների մեծամասնությամբ հաղթանակ է տարել ընդդիմադիր «Ազգ» (Millet) դաշինքը ներկայացնող քեմալական «Ժողովրդահանրապետական կուսակցության» (CHP-ԺՀԿ) թեկնածու Էքրեմ Իմամօղլուն:

Հայտնի է, որ Էքրեմ Իմամօղլուն վերջին 35 տարում տեղի ունեցած քաղաքապետի 8 ընտրություններում տոկոսային հարաբերակցությամբ ամենից շատ ձայներ հավաքած քաղաքապետն է:  Իմամօղլուն այդ 8 ընտրություններում միակ քաղաքապետն է, որ ստացել է քվեների 50 տոկոսից ավելին:

1984թ․ ընդունված «Օրենքի ուժ ունեցող որոշմամբ» (KHK)  Ստամբուլում, Անկարայում,  Իզմիրում ստեղծվեցին կառավարման նոր մարմիններ՝ այսպես կոչված «կենտրոնական քաղաքային մունիցիպալիտետներ» (büyükşehir belediyesi), իսկ 1984թ․ մարտի 25-ին առաջին անգամ կազմակերպվեցին այդ նոր կառույցի ղեկավարների (դասական ընկալմամբ՝ քաղաքապետի) ընտրությունները։ Այս ընտրություններում քվեների 49․69 տոկոսով Ստամբուլում հաղթեց իշխող «Հայրենիք» (Anavatan) կուսակցության թեկնածու Բեդրէթթին Դալանը։

1989թ․ մարտի 26-ի ընտրություններում կրկին իր թեկնածությունը դրած Դալանը պարտվեց «Սոցիալ-դեմոկրատական ժողովրդական» կուսակցության (SHP) թեկնածու Նուրէթթին Սյոզենին։ Սյոզենը այդ ընտրություններում հաղթեց քվեների 39.95 տոկոսով:  

1994թ. 25.19% հարաբերակցությամբ Ստամբուլի քաղաքապետ ընտրվեց «Refah» («Բարօրություն») կուսակցության թեկնածու Ռեջեփ Թայիփ Էրդողանը: Էրդողանը վերջին 35 տարում ամենից քիչ տոկոսային հարաբերակցությամբ Ստամբուլում ընտրված քաղաքապետն է: 

1999թ․ ապրիլի 18-ին քվեների 27.5 տոկոսով Ստամբուլի քաղաքապետ ընտրվեց նորաստեղծ «Fazilet» (Առաքինություն) կուսակցության թեկնածու Ալի Մյուֆիթ Գյուրթունան։ Իսկ 2004թ. 3 անգամ վերընտրվելով մինչև 2017թ. այդ պաշտոնը զբաղեցրեց Քադիր Թոփբաշը:  2017թ․ սեպտեմբերին Թոփբաշը հրաժարվեց Ստամբուլի քաղաքապետի պաշտոնից, և քաղաքային խորհրդի ընտրությամբ այդ պաշտոնում նրան փոխարինեց Մևլութ Ույսալը։