Պուտին-Էրդողան հանդիպման արդյունքները. Իդլիբի վրա հարձակում չի լինի

Քաղաքական10:13, 18 Սեպտեմբեր 2018

Պուտին-Էրդողան հանդիպման արդյունքները. Իդլիբի վրա հարձակում չի լինի

Սեպտեմբերի 17-ին Սոչիում տեղի ունեցած Ռուսասատանի ու Թուրքիայի նախագահների սիրիական Իդլիբ նահանգի հարցով հանդիպման ժամանակ համաձայնություն է ձեռք բերվել:

Վլադիմիր Պուտինի ու Ռեջեփ Թայիփ Էրդողանի, ինչպես նաև ընդլայնված կազմով բանակցությունների ավարտին հաջորդած համատեղ մամուլի ասուլիսին նախագահները հայտարարել են Իդլիբում բուֆերային գոտի ստեղծելու շուրջ պայմանավորվածության մասին:

Պուտինը, խոսելով ապառազմականացված գոտի ստեղծելու մասին, ասել է, որ Էրդողանի հետ նախ քննարկել են Իդլիբի զինյալների կողմից հնարավոր հարձակումների վտանգը Հալեպի, ինչպես նաև Հմեյմիմի ու Տարտուսի համար, որոնցում տեղակայված են ռուսական բազաները:

«Բոլոր այս հարցերը մանրամասնորեն քննարկելուց հետո որոշեցինք շփման գծի երկայնքով 15-20 կիլոմետրանոց ապառազմականացված գոտի հիմնել: Այդ ընթացքում բոլոր զինյալները դուրս կգան այնտեղից: Պարոն Էրդողանն առաջարկեց այնտեղից հանել նաև ծանր զրահատեխնիկան: Բոլոր ընդդիմադիր խմբավորումները դուրս կհանեն այդ շրջանից ծանր զրահատեխնիկան: Իդլիբում ռուս և թուրք զինվորների մասնակցությամբ վերահսկողության մեխանիզմներ կստեղծվեն: Համայում թուրքական կողմը անվտանգության միջոցներ կձեռնարկի: Սիրիայում ահաբեկչության դեմ պայքարում իրենց վճռականությունը ևս մեկ անգամ հաստատող Ռուսաստանն ու Թուրքիան կպահպանեն Աստանայի ձևաչափը և Ժնևում կնպաստեն հարցի քաղաքական լուծմանը»,- ասել է Ռուսաստանի նախագահը:

Թուրքիայի նախագահն էլ, տեղեկացնելով, որ այս համաձայնության արդյունքում տեղի չի ունենալու սպասվելիք զինված միջամտությունն Իդլիբում, ասել է. «Ռուսաստանը կձեռնարկի համապատասխան միջոցները ապառազմականացված գոտում զինված միջամտությունը բացառելու ուղղությամբ: Թե՛ երրորդ կողմի սադրանքները և թե՛ ձեռք բերված համաձայնության խախտումները կանխելու ենք համատեղ ուժերով»:

Նախագահների ելույթներից հետո 2 երկրի պաշտպանության նախարարներն իրենց ստորագրություններն են դրել «Իդլիբում լարվածության թուլացման գոտում իրավիճակը կայունացնելու մասին համաձայնագրի արձանագրության» տակ:

Աղբյուր` Gazetevatan

Այս ենթաբաժնի վերջին նորությունները

14:13, 15 օգոս

Մտադրություն կա Ադրբեջանից Սիրիա գազամատակարարման ծավալները հասցնել 6 մլն խմ-ի

Թուրքիայի էներգետիկայի և բնական պաշարների նախարարը խոսել է Ադրբեջանից Թուրքիայի տարածքով Սիրիա գազամատակարարման, Թուրքիա-Իրաք նավթատարի և Պակիստանի հետ նոր համաձայանգրեր կնքելու մասին։

12:54, 15 օգոս

Թուրքիան ինչու՞ է սպառնում Սիրիայի քրդերին

Թուրքիայի ԱԳ նախարարը զգուշացրել է, որ քրդական YPG-ն և SDF-ն պետք է ինտեգրվեն Սիրիայի պետական կառույցներին և զինաթափվեն։ Որո՞նք են Սիրիայի քրդերի շուրջ Թուրքիայի մտահոգությունները: