ERMENI HABER AJANSI

Բրիտանական «The Economist» ամսագիրը անդրադարձել է Թուրքիայում առաջիկայում կայանալիք արտահերթ ընտրություններին։

Աղբյուրը հիշեցնում է, որ արտահերթ ընտրությունների մասին որոշումը կայացվել է պարբերաբար երկարաձգվող «արտակարգ դրության» ռեժիմի՝ ևս 3 ամսով երկարացնելու մասին որոշումից ժամեր առաջ։  Այդ որոշման համաձայն՝ նախագահական և խորհրդարանական ընտրությունները կանցկացվեն նախապես հայտարարված տարեթվից գրեթե 18 ամիս առաջ՝ հունիսի 24-ին։

«Պարոն Էրդողանը, որ «արտակարգ դրության» ռեժիմի պայմաններում իր ձեռքն է հավաքել բոլոր լծակներն ու վերահսկում է գրեթե բոլոր մեդիա կառույցներն ու պետական հաստատությունները, պահպանողական ընտրողների շրջանում դեռևս ժողովրդականություն է վայելում։ Եվ, ըստ ամենայնի, նա հեշտությամբ կհաղթի այս մրցապայքարում, որի առումով ոչ ոք չի էլ ակնկալում, որ այն արդար է լինելու», -ասված է հոդվածում։

Ամսագիրը հիշեցնում է, որ Թուրքիայի տնտեսությունը, որ 2017թ․ հատուկ խթանող նախագծերի շնորհիվ որոշակի առաջընթաց էր գրանցել, առաջիկայում կարող է կտրուկ անկում ապրել։ Մյուս կողմից՝ թուրքական լիրան 2013թ․ հետո եվրոյի և ԱՄՆ դոլարի համեմատ շուրջ 100 միավորով արժեզրկվել է։ Երկրում գործունեություն ծավալող խոշոր ընկերությունները արտարժույթով մեծ պարտքեր են կուտակում։ Միայն «Yıldız Holdig»-ն ու  «Döviz Holding»-ը շուրջ 9 միլիարդ դոլարի պարտքեր ունեն։ Խոշոր ընկերությունների պարտքերը կազմում են Թուրքիայի համախառն ներքին արդյունքը շուրջ 70 տոկոսը։

«Պարոն Էրդողանի՝ արտահերթ ընտրություններ կազմակերպելու որոշման հավանական պատճառներից մեկն էլ այն է, որ նա, թերևս, ցանկանում է, որ այս բոլոր ցնցումները զգալի դառնան արդեն ընտրություններից հետո», -գրում  է բրիտանական պարբերականը։

«Carnegie Europe» վերլուծական կենտրոնի աշխատակից Սինան Ուլգենի խոսքով՝ տնտեսական խնդիրների վերաբերյալ ամենաչնչին տեղեկությունը կարող է բացասական ազդեցություն ունենալ ընտրությունների վրա՝ վտանգի ենթարկելով առաջին փուլում Էրդողանի հաղթանակը։