Ֆրանսիան ու Գերմանիան դիմել են Թուրքիային Ինջիրլիքի ռազմաբազան օգտագործելու համար

Միջազգային07:42, 02 Դեկտեմբեր 2015

Ֆրանսիան ու Գերմանիան դիմել են Թուրքիային Ինջիրլիքի ռազմաբազան օգտագործելու համար

Գերմանիայի պաշտպանության նախարարի խոսնակը հայտարարել է, որ կառավարությունը որոշում է կայացրել 6 «Tornado» ռազմական ինքնաթիռ, 1200 զինվորական և մեկ ֆրեգատ ներգրավվել Սիրիայում «Իսլամական պետություն» (ԻՊ) ահաբեկչական կազմակերպության դեմ ընթացող ռազմական գործողություններին:

Գերմանացի պաշտոնյան ավելացրել է նաև, որ ռազմական ինքնաթիռները տեղակայվելու են Թուրքիայի Ադանա քաղաքում գտնվող Ինջիրլիքի ռազմաբազայում, ինչի համար արդեն դիմել են թուրքական իշխանություններին:

Ըստ թուրքական «Haberler.com» կայքի` ԻՊ-ի դեմ պայքարում գերմանական առաքելության ծախսերը կկազմեն 134 մլն եվրո: Կառավարության որոշումը Բունդեսթագի կողմից հաստատվելուց հետո Գերմանիան 1 տարի ժամկետով կներգրավվի ԻՊ-ի դեմ անմիջական ռազմական գործողություններին` անհրաժեշտության դեպքում երկարաձգելով առաքելության ժամկետը:

Ինջիրլիքի, ինչպես նաև Թուրքիայի տարածքում գտնվող այլ ռազմաբազաներից օգտվելու ցանկության մասին այդ երկրի իշխանություններին նամակով դիմել է նաև Ֆրանսիան: Ռազմաբազաներից բացի Ֆրանսիան Թուրքիային է դիմել «Charles De Gaulle» ավիակիր ռազմանավի համար թուրքական Մերսին քաղաքի Թուշուջու նավահանգստից լոգիստիկ աջակցություն ստանալու համար:Նշվում է, որ թուրքական պաշտոնյաները հայտարարել են, որ դիմումները բավարարելու համար որևէ խոչընդոտ չեն տեսնում:

Աղբյուր` Ermenihaber.am