Դեմիրթաշ. «Թող գրողի ծոցը գնան ձեր ընտրություններն էլ, նախագահական պալատն էլ, պաշտոններն էլ»

Քաղաքական07:58, 14 Հոկտեմբեր 2015

Դեմիրթաշ. «Թող գրողի ծոցը գնան ձեր ընտրություններն էլ, նախագահական պալատն էլ, պաշտոններն էլ»

Այս օրերին Թուրքիայում մեծ աղմուկ է բարձրացրել քրդամետ «Ժողովուրդների դեմոկրատական կուսակցության» (ԺԴԿ-HDP) համանախագահ Սելահեթթին Դեմիրթաշի ելույթը, որում վերջինս սուր քննադատություններ է հնչեցնում իշխանությունների հասցեին: Դեմիրթաշի ելույթն ունի տասնյակ հազարավոր դիտումներ ու լայնորեն քննարկվում է սոցցանցերում:

Անդրադառնալով հոկտեմբերի 10-ին Անկարայում տեղի ունեցած ահաբեկչությանը՝ Դեմիրթաշը հանցագործներին հայտնաբերելու հարցում իշխանություններին մեղադրել է անգործության մեջ` ասելով.

«Ստաժյոր վարչապետը նախօրեին ստերով ու ապատեղեկատվությամբ լեցուն մի ելույթ ունեցավ: Ասաց բաներ, որոնց ինքը անձամբ չի հավատում: Ես խոսում եմ որպես մեկը, ով մի քանի ամսվա ընթացքում նմանատիպ հարձակումների հետևանքով կորցրել է իր 150 ընկերներին: Ոչ Սուրուչի, ոչ Դիարբեքիրի, ոչ Գեզիի ահաբեկչության մեղավորներին չեք հայտնաբերել, պարոնայք: Անկարայի դեպքում էլ նույնը կլինի: Այս ամենի հետևում կանգնածներին ջրի երես երբեք չեք բերի:

Սա Անկարան է, երկրի մայրաքաղաքը: Այստեղ մի թռչուն էլ թռնի`ազգային անվտանգությունը տեղյակ է դրանից: Սա այն քաղաքն է, որտեղ ազգային հետախուզությունն ամենաուժեղն է: Հարյուր հազարանոց հանրահավաք է արվում, և պետությունը անվտանգության ոչ մի միջոցառում չի ձեռնարկում: Արդյունքում` 2 զինված մահապարտ մտնում են ամբոխի մեջ և իրենց պայթեցնում: Լրագրողը արդարադատության նախարարին հարցնում է, թե վերջինս արդյոք հրաժարական կտա այս ամենից հետո: Նախարարն ի պատասխան ծիծաղում է: Դիահերձարանում 100 դի կա, իսկ նախարարը ծիծաղում է: Եվ մեր երկիրը սրա՞նք են կառավարում»:

Դեմիրթաշը նշել է, որ Անկարայում տեղի ունեցածով իշխանությունները ցանկացել են ցույց տալ, որ նրանք, ովքեր իշխող կուսակցության օգտին չեն քվերակում, իրենց թշնամին են:
«Դուք եք այս երկրի ղեկավարը ու դուք եք պատասխանատու այս ամենի համար: Թույլ չենք տա, որ երկրում ամեն օր կոտորած անեք: Մեռնողը մենք ենք: Ոստիկանն էլ ենք մեք, զինվորն էլ, թուրքն էլ, քուրդն էլ: Որպես չքավոր ազգի զավակներ՝ մենք ենք մեռնում, ոչ թե դուք»,-ասել է նա:

Ապա քուրդ գործիչը շեշտել է, որ այդ ամենն ասելով բնավ չի հետապնդում քվեներ ստանալու նպատակ. «Թող գրողի ծոցը գնան ձեր ընտրություններն էլ, նախագահական պալատն էլ, պաշտոններն էլ: Մենք մեր ազգի զավակի եղունգը անգամ ձեր գողացած տրիլիոնների հետ չենք փոխի»:

Իր ելույթում Դեմիրթաշը համարձակ հայտարարություններ է արել հատկապես վարչապետ Ահմեթ Դավութօղլուի հասցեին` ասելով.

«Դու ո՞վ ես, քեզ ու՞մ տեղն ես դրել: Չափդ ճանաչիր: Դու մեր վարչապետը չես և ուժով ես տիրացել այդ պաշտոնին: Թույլ չենք տա որ օր օրի դառնաս մեր մարդասպանը: Քո փոխարեն այս ամեն ինչից հետո ես թուրք ժողովրդից 100 անգամ ներողություն կխնդրեի ու հրաժարական կտայի: Մի քիչ պատիվ ունեցող մարդը նույնիսկ ոչ թե հրաժարական կտար, այլ ինքնասպանություն կգործեր: Ամաչեք»:

Եվ վերջում Դեմիրթաշը իշխանություններին զգուշացրել է. «Չփորձեք նման միջոցներով մեզ վախեցնել: Մենք Ալլահից բացի ուրիշ ոչ ոքից չենք վախենում: Մի կյանք ունենք, դա էլ պատրաստ ենք հազար անգամ մեր ազգին նվիրաբերել: Ամաչեք ու այս երկրից հեռացեք: Հուսանք այդ օրերը մոտ են, երբ կազատվենք ձեզանից»:

Աղբյուր` Ermenihaber.am

Այս ենթաբաժնի վերջին նորությունները

11:53, 29 օգոս

Թուրքիայի խորհրդարանը Գազայի հարցով արտակարգ նիստ կգումարի

Նիստում ելույթ կունենա Թուրքիայի արտգործնախարար Հաքան Ֆիդանը, ով կներկայացնի կառավարության դիրքորոշումը Գազայի վերաբերյալ։

10:49, 29 օգոս

Թուրքիայի արտգործնախարարն անդարդարձել է հայ-ադրբեջանական խաղաղության գործընթացին

Ֆիդան. «Ձեռք բերված մի շարք պայմանավորվածությունների շնորհիվ տարածաշրջանային խաղաղության առումով շատ լավ պատկեր է ձևավորվել»:

09:44, 29 օգոս

Թուրքիայի արտգործնախարարը հեռախոսազրույց է ունեցել ամերիկացի գործընկերոջ հետ

Մարկո Ռուբիոյի հետ զրույցում Ֆիդանը նշել է, որ Թուրքիան պատրաստ է ռուս-ուկրաինական բանակցային գործընթացում անել այն, ինչն իր պատասխանատվության շրջանակներում է: