ERMENI HABER AJANSI

Մարտի 31-ին Թուրքիայում անցկացված տեղական ինքնակառավարման մարմինների ընտրույթուններից հետո երկրի մի շարք նահանգներում ցույցերի տարափ է սկսվել: 

Ցույցերի պատճառ է հանդիսացել այն, որ չնայած Վանում ընդդիմադիր, քրդամետ «Ժողովուրդների հավասարության և ժողովրդավարության» կուսակցության (DEM) թեկնածուն ընտրվել է որպես քաղաքապետ, նրան զրկել են ընտրվելու իրավունքից ու որպես նորընտիր քաղաքապետ նշանակել իշխանական կուսակցության թեկնածուին: 

Ապրիլի 2-ին ցույցերը տեղի են ունեցել նախ Վանի նահանգապետարանի առաջ, որից հետո դրանք տարածվել են նահանգի շրջաններում, ինչպես նաև Բիթլիսում և Սիիրթում: 

Այս ամենին հաջորդել է ցույցերի արգելման մասին նահանգապետարանների հրապարակած հայտարարությունները: 

Ըստ այդմ՝ Վանում և Բիթլիսում բոլոր տեսակի ցույցերն արգելվել են 15 օրով: Արգելվել է նաև մուտքն ու ելքը նահանգներ: 

Իսկ Սիիրթում ցույցերն արգելելու մասին որոշումը մնալու է ուժի մեջ, քանի դեռ նահանգային ղեկավարության կառույցից մեկ այլ հայտարարություն չի տարածվել՝ այն չեղարկելու մասին: Այս դեպքում ևս մուտքերն ու ելքերն արգելված են: 

Հիշեցնենք, որ ՏԻՄ ընտրություններում ձայների 55 տոկոսով Վանի քաղաքապետ ընտրված DEM կուսակցության թեկնածու Աբդուլլայ Զեյդանին թույլ չէր տրվել ստանձնել իր պաշտոնը:

Թուրքական մամուլում նշվում էր, որ նրանից ետ էր վերցվել ընտրվելու իրավունքը «Արգելված իրավունքների ետ առնման» հիմունքներով, իսկ քաղաքապետի պաշտոնի մանդատը հանձնվել էր ձայների 27 տոկոսը հավաքած ԱԶԿ-ի թեկնածու Աբդուլահաթ Արվասին:

DEM կուսակցության անդամ և ընտրությունների արդյունքներով քաղաքապետի պաշտոնն այդպես էլ չզբաղեցրած անձը կոչ էր արել ժողովրդին արտահայտել իրենց բողոքը որոշման դեմ:

Ապրիլի 2-ին Վանի նահանգային ղեկավարության շենքի առաջ կազմակերպված ցույցը ոստիկանների կողմից ենթարկվել էր պղպեղային գազի կիրառմամբ միջամտության: Մասնակիցների թվում եղել էին նաև Զեյդանը և նրա մի շարք կուսակիցներ:

Զեյդանը հայտարարել էր նաև որոշումը բողոքարկելու մասին, իսկ տեղի ունեցածը որակել իշխանականների միջամտությամբ մեկնարկված քաղաքական հեղաշրջման գործընթացի շարունակություն: