ERMENI HABER AJANSI

Թուրքիայի վիճակագրական ինտիտուտի (TÜİK) տվյալների համաձայն՝ պաղեստինա-իսրայելական հակամարտության 2023-ի հոկտեմբեր 7-յան սրացումներից հետո Թուրքիա-Իսրայել առևտրաշրջանառությունը նվազել է:

Նշվում է, որ 2023-ի հոկտեմբեր-դեկտեմբեր ժամանակահատվածում Թուրքիայից Իսրայել իրականացված արտահանումները 2022-ի նույն ժամանակահատվածի համեմատ նվազել են 34 տոկոսով՝ կազմելով 1.1 մլրդ դոլար:

Իսկ Իսրայելից Թուրքիա իրականացված արտահանումները, նվազելով 58 տոկոսով, կազմել են 322 մլն դոլար:

Հատկանշական է նաև, որ չնայած թվերի նահանջող ցուցանիշներին, վերջին 10 տարվա ընթացքում Թուրքիայից Իսրայել իրականացված արտահանման ծավալներում 2023-ի ցուցանիշն ամենաբարձր երեք ցուցանիշից մեկն է համարվել:

2023-ին դեպի Իսրայել արտահանումների ընդհանուր ծավալը կազմել է շուրջ 5.5 մլրդ դոլար: 

Նշենք, որ թուրքական մեդիայում նման ցուցանիշների մասին շրջանառվող լուրերում ընդգծվում է այն փաստը, որ չնայած հոկտեմբերի 7-ից ի վեր Թուրքիայի կողմից վարվող հակաիսրայելական քաղաքականությանը, երկու երկրի առևտրաշրջանառության ծավալներում հոկտեմբեր-դեկտեմբեր ամիսներին գրանցված նվազմանը, այն շարունակում է մնալ շոշափելի մակարդակում: