Չավուշօղլու. «Վաղը եթե հարաբերությունները կարգավորվեն, սահմանները պետք է բացվեն»

15:37, 11 Հոկտեմբեր 2022

Չավուշօղլու. «Վաղը եթե հարաբերությունները կարգավորվեն, սահմանները պետք է բացվեն»

Թուրքիայի արտգործնախարար Մևլութ Չավուշօղլուն թուրքական «TVNET» հեռուստաընկերության «Հստակ տեսակետ» հաղորդման ժամանակ անդրադարձել է հայ-թուրքական կարգավորման գործընթացին, ինչպես նաև Հայաստան-Ադրբեջան ներկայիս գործընթացին:

Չավուշօղլուն ասել է, որ երկուստեք հարաբերությունները կարգավորելու հարցում իրենք անկեղծ են, որովհետև հատկապես հիմա բոլորին և գլխավորապես Հայաստանին շատ անհրաժեշտ է կայունությունը Հարավային Կովկասում

«Հայաստանը, սակայն, որոշակի տրավմա է վերապրել և դա էլ պետք է հասկանալ... Պատերազմից հետո հայ ժողովրդի աջակցությունը Փաշինյանին ցույց է տալիս, որ նրանք խաղաղություն են ցանկանում, իսկ խաղաղություն չցանկացողների ձայնը բարձր է գալիս հատկապես հայկական սփյուռքից: Եվ սա ճնշում է: Հայաստանն էլ պետք է սա հասկանա»:

Այնուհետև Թուրքիայի արտգործնախարարը նշել է, որ վերջին բանակցությունները (Բրյուսել, Պրահա,) նախորդների համեմատ ավելի լավ են անցնում։ Ըստ նրա՝ անհրաժեշտ է, որ Ադրբեջանն ու Հայաստանը ստորագրեն մնայուն խաղաղության պայմանագիր: Բայց այդ մնայուն խաղաղությանը պայմանագրին տանող ճանապարհին էլ կան այնպիսի խնդիրներ, ինչպիսին է օրինակ սահմանների ճշգրտումը/սահմանազատումը։ Այդուհանդերձ, ըստ նրա, Հայաստանն ու Ադրբեջանը համաձայնության են եկել խաղաղության պայմանագրի 5 սկզբունքի շուրջ, մնացել է դրանք կյանքի կոչել։

«Երկու կողմն էլ աշխատանքներ են կատարում սահմանների ճշգրտման ուղղությամբ և այդ նպատակով հանձնաժողովներ են ստեղծվել, մյուս հարցը միմյանց տարածքային ամբողջականության և ինքնիշխանության նկատմամբ հարգանքն է: Հիմքը սա է: Այս սկզբունքից ելնելով, պետք է, որ միմյանց վրա չհարձակվեն: Սա էլ նշանակում է, որ այս առումով Հայաստանը չպետք է դիմի սադրանքների»,- մեղադրական շեշտադրումներ է արել Չավուշօղլուն։

Նա վերահաստատել է այն մոտեցումը, որ Թուրքիա-Հայաստան կարգավորման գործընթացն անջատ չէ Հայաստան-Ադրբեջան գործընթացից, Անկարան մշտապես Բաքվի հետ համակարգում է իր քայլերը։

«Մենք պարզ ասում ենք, որ իհարկե, Ադրբեջանից լիովին անկախ շարժվել չենք կարող: Սա պետք է բացեիբաց ասել: Օրինակ՝ 2009-ին որոշակի նեղվածություն առաջացավ, այն ժամանակ գործընթացը կարող էր ավելի լավ կառավարվել Ադրբեջանի հետ: Իսկ հիմա մեր նախագահը և Ադրբեջանի նախագահը մշտական շփման մեջ են, Ջեյհուն եղբորս հետ էլ միշտ շփման մեջ ենք: Իհարկե, մեր այս համագործակցությունն ուղղված չէ Հայաստանի դեմ»:

Չավուշօղլուն նաև նշել է, որ Հայաստանի հետ հարաբերությունները կարգավորելու համար իրենք բազմաթիվ ժեստեր են անում. բացել են օդային տարածք, ուղիղ թռիչքներ են սկսվել, սահմանային գոտում աշխատանքներ են իրականացնում և այլն։

«Սահմանին գետեր կան, պիտի ուսումնասիրել դրանց հունի փոփոխություններ եղե՞լ են, թե՞ ոչ։ Ճանապարհներ, կամուրջներ, անցումներ կան: Այսինքն, վաղը եթե հարաբերությունները կարգավորվեն, սահմանները պետք է բացվեն ու դրա համար նախապատրաստություն պետք է տեսնել:

Ի վերջո, մեր նախագահը Փաշինյանի հետ հանդիպմանը բոլոր այս հարցերը բարեկամաբար, անկեղծ մթնոլորտում քննարկել է։ Արդյունավետ հանդիպում էր: Սակայն Հայաստանի վրա ճնշում կա, դա տեսնում ենք»,- եզրափակել է Թուրքիայի արտաքին գերատեսչության ղեկավարը։

Աղբյուր` Ermenihaber.am