ERMENI HABER AJANSI

Թուրքական «Yöneylem» հետազոտական ընկերությունը հրապարակել է Թուրքիայում անցկացված նոր սոցհարցման արդյունքները: Այն իրականացվել է պարզելու, թե այս պահին Թուրքիայի քաղաքական կուսակցությունները ինչ վարկանիշ և աջակցության ունեն:

Սոցհարցումն անցկացվել է Թուրքիայի 27 նահանգներում 2000 մասնակցի շրջանում, որոնց խնդրել են պատասխանել, թե առաջիկա կիրակի խորհրդարանական ընտրություն լինելու դեպքում ում կընտրեին:

Հետազոտության արդյունքների համաձայն՝ Թուրքիայի իշխող «Արդարություն և զարգացում» կուսակցությանը (AKP-ԱԶԿ) աջակցություն է հայտնել հարցվածների 31.8 տոկոսը:

30.3 տոկոսը հայտնել է, որ պատրաստ է քվեարկել գլխավոր ընդդիմադիր քեմալական «Ժողովրդահանրապետական» կուսակցության (CHP-ԺՀԿ) օգտին: Վերջինի գործընկեր «Լավ» կուսակցությունը 3-րդն է ստացած աջակցությամբ՝ 13.1 տոկոս:

Քրդամետ «Ժողովուրդների դեմոկրատական կուսակցությունը» (HDP-ԺԴԿ) ստացել է հարցման մասնակիցների 10.6 տոկոսի աջակցությունը, իսկ աջ ծայրահեղական «Ազգայնական շարժում» կուսակցությունը (MHP-ԱՇԿ)՝ 6.4 տոկոսի: 1.2 տոկոսը հայտնել է, որ քրվեարկելու է Թուրքիայի նախագահ Ռեջեփ Թայիփ Էրդողանի նախկին թիմակից Ալի Բաբաջանի «DEVA» կուսակցության օգտին, 1.1  տոսկոսը՝ «Նորից բարօրություն» կուսակցության օգտին: Էրդողանի մեկ այլ նախկին թիմակից Ահմեթ Դավութօղլուի հիմնած «Ապագա» կուսակցությանը կողմ արտահայտվածների թիվը կազմել է 0.7 տոկոս:

Ըստ այս արդյունքերի՝ իշխող ԱԶԿ-ի և ԱՇԿ-ի ձևավորած «Ժողովուրդ» դաշինքի ձայների հանրագումարը կազմել է 38.2 տոկոս, իսկ մրցակից «Ազգ» դաշինքի կազմող ԺՀԿ-ի և «Լավ» կուսակցության ստացած ընդհանուր ձայները կազմել են 43.4 տոկոս:

Այսպիսով՝ Էրդողանի կուսակցության և քեմալական կուսակցության միջև ձայների տարբերությունը նվազել է մինչև 1.5 տոկոս հօգուտ ԱԶԿ-ի: Իսկ ահա իրար մրցակից «Ժողովուրդ» և «Ազգ» դաշինքների ձայների տարբերությունը կազմել է 5.2 տոկոս ի օգուտ ընդդիմադիրների կազմած «Ազգ» դաշինքի: