Թուրքիայում հետաքննություն է սկսվել Էրդողանին ահաբեկիչ անվանած հոլանդացի կուսակցապետի դեմ

Քաղաքական12:52, 16 Փետրվար 2021

Թուրքիայում հետաքննություն է սկսվել Էրդողանին ահաբեկիչ անվանած հոլանդացի կուսակցապետի դեմ

Փետրվարի 15-ին Նիդերլանդների «Հանուն Ազատության կուսակցության» (PVV) առաջնորդ, Ներկայացուցիչների պալատի անդամ Խիրտ Վիլդերսը Twitter-ում հրապարակել է Թուրքիայի նախագահ Ռեջեփ Թայիփ Էրդողանի լուսանկարը` վերջինիս անվանելով ահաբեկիչ: Վիլդերսը հայտնի է Թուրքիայի և թուրքական իշխանությունների հասցեին սուր քննադատություներով:

Նա Էրդողանին մեղադրում է իսլամական ծայրահեղական շարժումներն ու ահաբեկչական կազմակերպությունները ֆինանսավորելու և հակաարևմտյան քաղաքականություն վարելու մեջ:

Նշենք, որ հիշյալ լուսանկարում Էրդողանը պատկերված է իր բնական և «Իսլամական պետություն» ահաբեկչական խմբավորման գրոհայինի դեմքով: Ձախ մասում պատկվերված է Թուրքիայի պետական դրոշը, իսկ աջ մասում՝ ԻՊ-ի դրոշը:

Վիլդերսը այս լուսանկարով աշխարհին փորձում է ևս մեկ անգամ հիշեցնել ԻՊ-ի և Էրդողանի միջև եղած կապը:

Թուրքիայի գլխավոր դատախազությունը հայտնել է հոլանդացի քաղաքական գործչի դեմ հետաքննություն սկսելու մասին:

Դատախազության տարածած հաղորդագրության մեջ նշվում է, որ հետաքննություն սկսելու պատճառը Վիլդերսի կողմից հրապարակված Էրդողանի լուսանկարն ու նրա հասցեին արված գրառումն է:

Terrorist. pic.twitter.com/ZL8ZD519aW
— Geert Wilders (@geertwilderspvv) February 15, 2021

Խիրտ Վիլդերսը 2020թ. հոկտեմբերին Էրդողանի ևս մեկ ծաղրանկար էր հրապակել Twitter-ում, որին կից կրկին գրել էր ահաբեկիչ: Այս կապակցությամբ Թուրքիայի նախագահը պահանջել էր քրեական գործ հարուցել Վիլդերսի դեմ: