ERMENI HABER AJANSI

Գերմանիայում և Ֆրնասիայում բնակվող քրդերը և տեղի բնակիչները  հակաթուրքական ցույցեր են կազմակերպել։ 

Մասնավորապես գերմանական Օսնաբրյուք  և Գիեսեն քաղաքներում կազմակերպված երթերով ու հանրահավաքներով ցուցարարներն իրենց դժգոհությունն են արտահայտել Թուրքիայի՝ Իրաքի Հարավային Քուրդիստան նահանգի դեմ կազմակերպած ռազմական արշավների առթիվ։

Գիեսենում ցուցարարները վանկարկել են «Ահաբեկիչ Էրդողան», «Ահաբեկիչ Թուրքիա», «Եվրոպան ֆինանսավորում է, Թուրքիան՝ ռմբակոծում», «Էրդողանը ֆինանսավորում է, ԻՊ-ը՝ հարձակվում», «Biji Serok Apo» (քրդ․ Կեցցե նախագահ Օջալանը), «Կեցցե Քուրդիստանի դիմադրությունը» կարգախոսները։

Ցույցերին բացի քրդերից մասնակցել են նաև գերմանացիներ։ Ցուցարարները կոչ են արել միջազգային հանրությանը՝ անտարբեր չմնալ Թուրքիայի նախաձեռնած հարձակումների և կոտորածների նկատմամբ։ Բողոքի ակցիաներին աջակցել են նաև տեղի քրդական հասարակական կազմակերպությունները։

Թուրքիայի հարձակողական գործողությունները դատապարտող նմանատիպ միջոցառում է տեղի ունեցել նաև Ֆրանսիայի Ռենն քաղաքում։ Քրդական կազմակերպությունները այստեղ էլ մարդաշատ երթ են կազմակերպել։ Ցուցարարները օգտագործել են  «Ոչ պատերազմին Քուրդիստանում», «Քուրդիստանը ֆաշիզմի գերեզմանն է դառնալու» բովանդակությամբ պաստառներ և վանկարկել «Մարդասպան, ֆաշիստ, բռնապետ Էրդողան», «Օջալանին ազատություն, Քուրդիստանին՝ կարգավիճակ», «Կեցցե նախագահ Օջալանը» կարգախոսները։ Երթին ներկա գտնված ֆրանսիացիները ծափողջյուններով աջակցել են միջոցառման մասնակիցներին։