Թուրքիայում սպանվել է Դինքի գործով անցած ժանդարմերիայի նախկին հետախույզը

Իրավական14:58, 12 Մարտ 2020

Թուրքիայում սպանվել է Դինքի գործով անցած ժանդարմերիայի նախկին հետախույզը

Պոլսահայ ականավոր գործիչ Հրանտ Դինքի սպանության ժամանակ դեպքի վայրում լինելու պատճառով ձերբակալված և հետո ազատ արձակված թուրքական ժանդարմերիայի հետախույզ Շերեֆ Աթեշը Թուրքիայի Դյուզջե բնակավայրում իր մեքենայի մեջ սպանված է հայտնաբերվել։

Թուրքական մամուլում տարածված տեղեկությունների համաձայն՝ արդեն պահեստազորի հետախույզ Շերեֆ Աթեշը զինված հարձակման զոհ է դարձել։ Հարձակումն իրականացնողները փախուստի են դիմել, այնուհետև դեպքի վայր են ժամանել ոստիկանական ստորաբաժանումները և շտապ օգնության բժիշկները:

Շերեֆ Աթեշին նրանք հայտնաբերել են ամբողջովին արնաշաղախ վիճակում։

Հիշեցնենք, որ թուրքական ժանդարմերիայի հետախույզ Շերեֆ Աթեշը, որոշ պնդումների համաձայն, Հրանտ Դինքի սպանության ժամանակ կապի մեջ է եղել սպանությունը կազմակերպող և իրականացնող անձանց հետ, ովքեր Դինքի տան և նրան պատկանող «Beyaz adam» գրախանութի մոտ հետևում էին Դինքին և արձանագրում նրա տեղաշարժերը։