Էրդողանի խոսնակ. «Թուրքիայի անվտանգությունը սկսվում է «Ազգային ուխտի» սահմաններից էլ անդին»

Քաղաքական17:09, 25 Դեկտեմբեր 2019

Էրդողանի խոսնակ. «Թուրքիայի անվտանգությունը սկսվում է «Ազգային ուխտի» սահմաններից էլ անդին»

Թուրքիայի նախագահականի խոսնակ Իբրահիմ Քալընն անդրադարձել է Սիրիա ու Իրաք ներխուժումների, ինչպես նաև առաջիկայում Լիբիա զորք ուղարկելու համար երկրի իշխանությունների դեմ հնչող քննադատություններին: Քալընը հայտարարել է, որ իրենց համար անհասկանալի են այդ քննադատություններն ու ավելացրել.

«Թուրքիայի անվտանգությունը «Ազգային ուխտի» սահմաններից անդին է սկսվում: Սա կարող է տեսնել Թուրքիայի Հանրապետության պատմությունը իմացող ամեն ոք»:

Քալընն ասել է, որ իրենց պարտականությունն է Թուրքիայի Հանրապետությաշունը բոլոր կողմերից ապահովագրել ու երաշխավորել երկրի բոլոր քաղաքացիների գոյակցությունը խաղաղության, անվտանգության ու կայունության պայմաններում:

«Ստիպված ենք անվտանգության շրջագիծը շատ ավելի լայն տարածքի վրա գծել: Այդ պատճառով էլ մեզ հետաքրքրում են Լիբիայում տեղի ունեցող զարգացումները: Անշուշտ, անհնար է նաև, որ մենք անտարբեր ու անհաղորդ մնանք Սիրիայում, Իրաքում, Բալկաններում, Իրանում, Աֆղանստանում, Կովկասում տեղի ունեցող զարգացումներին»,- ասել է Թուրքիայի նախագահականի խոսնակը:

Հիշեցնենք, որ «Ազգային ուխտ»-ը (Misak-ı Millî), ընդունել է օսմանյան խորհրդարանը 1920թ. հունվարի 28-ին՝ քեմալականների ճնշմամբ։

«Ազգային ուխտի» սկզբունքներ մշակվել էին քեմալականների՝ 1919թ. սեպտեմբերին Սեբաստիայում (Սվազում) կայացած կոնգրեսում։ Ազգային ծրագրի հիմքում ընկած էր «ազգային սահմանի» սկզբունքը, որը պահանջում էր Թուրքիայի տարածք ճանաչել այն բոլոր հողերը, որոնք Օսմանյան կայսրության կազմում էին Մուդրոսի զինադադարի (1918) կնքման պահին՝ առանց արաբական երկրների։ Ազգային ուխտի համաձայն՝ ներկայիս տարածքից բացի Թուրքիայի մեջ պետք է մտներ Արևմտյան Թրաքիան, Սիրիայի Հալեպ, Դերզոր, Իրաքի Մոսուլ Քերքուք և Սուլեյմանիյե շրջանները, ինչպես նաև Վրաստանի Բաթումի շրջանը:

Աղբյուր` Anadolu ajansı