ERMENI HABER AJANSI

Վաշինգտոնում ապրող թուրք լրագրող, վերլուծաբան Մութլու Չիվիրօղլուն «Bianet»-ին տված հարցազրույցում մեկնաբանել է ԱՄՆ նախագահի ազգային անվտանգության հարցերով խորհրդական Ջոն Բոլթոնի այցը Թուրքիա:

«Էրդողանի` Բոլթոնի հետ հանդիպումից հրաժարվելը  և Բոլթոնի` Թուրքիայից հեռանալը ցույց են տալիս ԱՄՆ-ի և Թուրքիայի միջև խնդիրների խորությունը»,-ասել է Չիվիրօղլուն: 

Լրագրողը նշել է, որ Բոլթոնի այցը կարևոր է այն առումով, որ ավելի կոնկրետ են քննարկվել Թրամփի և Էրդողանի հեռախոսազրույցում քննարկված հարցերը:

Բացի այդ, լրագրողի փոխանցմամբ` Բոլթոնի այցը կարևոր է Սիրիայում  Թուրքիայի հնարավոր դերակատարության տեսանկյունից, և այն առումով, որ եթե վերջինս դերակատարություն ունենա, ապա ինչպիսի դերի մասին է խոսքը գնալու:

Չիվիրօղլուի կարծիքով` Բոլթոնը այն անձանցից է, ովքեր կոշտ հակաթուրքական և հակաիրանական դիրքորոշում ունեն:

Անդրադառնալով Սիրիայի քրդերի նկատմամբ ԱՄՆ-ի դիրքորոշմանը` Չիվիրօղլուն ասել է. «Բոլթոնի հիմնական նպատակն է ցույց տալ ԱՄՆ-ի լրջությունը քրդերի հարցում»:

Ինչ վերաբերվում է ԱՄՆ և Թուրքիայի նախագահների միջև կայացած հեռախոսազրույցին, Չիվիրօղուն ասել է, որ ամերիկյան մամուլում բազմիցս նշվում է, որ  հնարավոր է, որ Թրամփի կայացրած որոշման նպատակը  «Իսլամական պետություն»(ԻՊ) ահաբեկչական խմբավորման դեմ պայքարը Թուրքիային փոխանցելն է: 

Նշենք, որ Թրամփը երեք շաբաթ առաջ հայտնել էր Սիրիայից ԱՄՆ զորքերը դուրս բերելու որոշման մասին: