Թուրքիան Պակիստանի համար կարտադրի հետախուզական ռազմանավեր

Ռազմական11:09, 28 Նոյեմբեր 2018

Թուրքիան Պակիստանի համար կարտադրի հետախուզական ռազմանավեր

Թուրքիայի պաշտպանական արդյունաբերությունը մտադիր է նպաստել Պակիստանի բանակի մոդեռնիզացիային և հզորացմանը։

Պակիստանի Քարաչի քաղաքում կազմակերպված «IDEAS» միջազգային ռազմարդյունաբերական տոնավաճառին մասնակցել է Թուրքիայի պաշտպանության փոխնախարար Մուհսին Դերեն: Լրագրողների հետ զրույցում նա տեղեկություններ է հրապարակել պաշտպանական արդյունաբերության ոլորտում թուրք-պակիստանյան համագործակցության վերաբերյալ։

Պակիստանում կազմակերպված վերոհիշյալ ռազմական տոնավաճառին ամենալայն կազմով մասնակցած երկիրը Թուրքիան է․ ներկայացված է 25 թուրքական ընկերություն։

Թուրք փոխնախարարը նշել է, որ Պակիստանը պատրաստվում է Թուրքիայից որոնողափրկարարական նավեր պատվիրել։ Բացի այդ՝ Թուրքիան Պակիստան կարտահանի սեփական արտադրության «MİLGEM» (Ազգային նավ) հետախուզական ռազմանավեր։

Պակիստանի պատվիրած նավերից 2-ը կառուցվելու են Ստամբուլի նավաշինարանում, մյուս 2-ը՝ Պակիստանի Քարաչի քաղաքում: Այժմ աշխատանքներ են տարվում Քարաչիի նավաշինարանի հնարավորությունների ուսումնասիրման և թուրք ինժեներների համար համապատասխան պայմանների ստեղծման ուղղությամբ։ Այնուհետև կսկսվեն նախագծման աշխատանքները, որոնք կշարունակվեն շուրջ 10 ամիս։