ERMENI HABER AJANSI

Նոյեմբերի 20-ը երեխաների պաշտպանության միջազգային օրն է։ Թուրքական կայքը վերլուծել է ՄԱԿ-ի մանկական հիմնադրամի (UNISEF) և «Տնտեսական համագործակցության ու զարգացման կազմակերպության» (OECD) հրապարակած տվյալները Թուրքիայում երեխաների իրավունքների վիճակի վերաբերյալ։

Ըստ այդմ՝ Թուրքիայում ամենավատ ցուցանիշներ գրանցած ոլորտներից է նախադպրոցական կրթության ոլորտը։ Այս երկրում 3-5 տարեկան երեխաների միայն 37 տոկոսն է հաճախում նախակրթարաններ։ Մինչդեռ OECD անդամ երկրներում այս ցուցանիշի միջինացված արժեքը 86 տոկոսն է։

Մանկական մահացությունների թիվը Թուրքիայում վերջին տասնամյակներում զգալիորեն նվազել է։ Եթե 1990-ականներին յուրաքանչյուր 1000 երեխայից մինչև 5 տարեկան դառնալը մահանում էր 72-ը, ապա 2016թ․ դրությամբ այդ ցուցանիշը հասել  է 12-13-ի։ Համեմատության համար նշենք, որ օրինակ Գերմանիայում, Իտալիայում և Նորվեգիայում մինչև 5 տարին լրանալը մահացող երեխաների թիվը հավասար է 2-4 / 1000 –ի։

Մյուս կողմից՝ վիճակագրությունը ցույց է տվել, որ Թուրքիայում, Իսպանիայում և Հունգարիայում 2016թ․ դրությամբ ամենից շատ է աճել չքավոր երեխաների թիվը։ 2007-2011թթ․ աղքատ երեխաների թիվը Թուրքիայում ավելացել է ավելի քան 5 անգամ։ Թուրքիայում աղքատ երեխաների թիվը կազմում է 28․4 տոկոս։ Այս ցուցանիշը Թուրքիան երկրորդ տեղում է՝ Իսրայելից հետո։

OECD–ի կողմից 2015թ․ 28 երկրներում անցկացված մի հետազոտության համաձայն՝ Թուրքիայում դպրոցականների 19 տոկոսը ամսական մի քանի անգամ դպրոցում  ենթարկվում է խոսքային կամ ֆիզիկական բռնության։  Նույն հետազոտության արդյունքները ցույց են տվել, որ 15 տարեկանների շրջանում ամենադժբախտը Թուրքիայում ապրող դեռահասներն են։ Այս չափանիշը գնահատող 10 բալանոց սանդղակից Թուրքիան ստացել է 6․12 միավոր և զբաղեցրել 28 երկրների ցանկի վերջին հորիզոնականը։

Արձանագրվել է նաև, որ Թուրքիայում միջնակարգ կրթության ապահովման նպատակով յուրաքանչյուր աշակերտի համար տարեկան ծախսվում է 4․652 դոլար, իսկ OECD անդամ երկրներում այս ցուցանիշը միջինում 10․391 դոլար է։