Թուրքիայում կինը կացնով հարձակվել է Աթաթուրքի արձանի վրա (տեսանյութ)

Հասարակական11:40, 13 Նոյեմբեր 2018

Թուրքիայում կինը կացնով հարձակվել է Աթաթուրքի արձանի վրա (տեսանյութ)

Վերջին տարիներին Թուրքիայում աճում են Աթաթուրքի արձանների, կիսանդրիների, պատկերների նկատմամբ կատարված տարատեսակ «հարձակումները»։

Այդպիսի մի դեպք էլ գրանցվել է Թուրքիայի Թեքիրդաղ նահանգի (պատմ. Արևելյան Թրակիա) Չորլու շրջանում։

Ինքնությունը չպարզված մի կին կացնով հարձակվել է Աթաթուրքի արձանի վրա, հարվածել արձանի ոտքին, ապա մոտակայքում գտնվողների արձագանքից հետո թաքցրել է կացինն իր հագուստի տակ ու դիմել փախուստի։

Ականատեսներից մեկը իր հեռախոսով նկարել է տեղի ունեցածը և այդ մասին հայտնել ոստիկանությանը։

Դեպքի վայր ժամանած ոստիկանները հայտնաբերել են, որ Աթաթուրքի արձանի ոտքը վնասվել է։ Կինն արձանի վրա նաև ինչ-որ գրություն էր թողել, որի բովանդակությունը, սակայն, չեն կարողացել վերծանել։

Կացնով «Աթաթուրքի ոտքին» հարվածող կինը գտնվում է հետախուզման մեջ։