Գերմանիան կարող է իր զինվորներին դուրս բերել Ինջիրլիքի ռազմաբազայից

Միջազգային12:20, 17 Մայիս 2017

Գերմանիան կարող է իր զինվորներին դուրս բերել Ինջիրլիքի ռազմաբազայից

Գերմանիայի արտաքին գործերի նախարար Սիգմար Գաբրիելը մեկնաբանել է Թուրքիայի կողմից Ինջիլիքի ռազմաբազայում տեղակայված գերմանացի զինվորներին տեսակցելու թույլտվություն չտալու որոշումը:

Թուրքական «Demokrathaber» լրատվական կայքը տեղեկացմամբ՝ Գաբրիելը նշել է, որ Թուրքիայի կողմից Ինջիրլիքը որպես քաղաքական գործիք օգտագործելու ցանկությունը լավ արդյունքի չի հանգեցնի:

Գաբրիելը նշել է, որ քաղաքական ապաստան ստանալու իրավունքը ամրագրված է Գերմանիայի սահմանադրությամբ: Եվ երբ որևէ մեկը ճնշումներ է գործադրում, որ Գերմանիան անտեսի այդ սահմանադրական իրավունքը կամ արտահանձնի քաղաքական ապաստան խնդրածներին գերմանացի զինվորներին այցելելու թույլտվության դիմաց, ապա կհանդիպի Գերմանիայի կոշտ դիրքորոշմանը:

«Մենք ո՛չ անցյալում, ո՛չ էլ ապագայում նման բան թույլ չենք տա»,-ընդգծել է արտգործնախարարը:

Նա նաև զգուշացրել է Թուրքիային, որ եթե այդ երկիրը իր պահվածքը չփոխի, ապա Գերմանիան իր զինվորներին Թուրքիայից դուրս կբերի:

Գաբրիելը նշել է, որ Գերմանիան, չնայած բազմաթիվ վիրավորանքներին, միշտ փորձել է Թուրքիայի կառավարության հետ շփման ուղիները բաց պահել:

«Սակայն եթե Գերմանիայի քաղաքացիներին պետք է առանց հիմնավոր փաստարկների ձերբակալեն, արգելեն, որ հյուպատոսությունը օգնի նրանց, թույլ չտան լքել Թուրքիան, եթե պետք է ճնշում գործադրեն Բունդեսթագի վրա, ինչպես հիմա են անում, ապա համբերության սահմանը կհատեն: Հույս ունեմ, որ Թուրքիայի կառավարությունը մոտ օրերին մտքափոխ կլինի: Հակառակ դեպքում Գերմանիայի խորհրդարանը անկասկած իր զինվորիներին Թուրքիայում չի թողնի»:

Աղբյուր` Ermenihaber.am