Գերմանիայի թուրքական կազմակերպությունները սահմանադրական փոփոխությունների դեմ ստորագրահավաք են սկսել

Միջազգային08:10, 24 Մարտ 2017

Գերմանիայի թուրքական կազմակերպությունները սահմանադրական փոփոխությունների դեմ ստորագրահավաք են սկսել

Գերմանիայի թուրքական կազմակերպությունները Թուրքիայում ապրիլի 16-ին տեղի ունենալիք սահմանադրական փոփոխությունների հանրաքվեին դեմ քվեարկելու կոչով ստորագրահավաք են սկսել:

Ըստ թուրքական «Demokrathaber.org» լրատվական կայքի` մարտի 23-ին սկսված ստորագրահավաքի արշավին Գերմանիայի թուրքական համայնքային կազմակերպություններից բացի միացել է նաև «Գերմանիայում ավելի շատ ժողովրդավարություն» միությունը: Ստորագրահավաքին իրենց ստորագրություններով միացել են նաև Գերմանիայի «Կանաչների կուսակցության» ազգությամբ թուրք համանախագահ Ջեմ Օզդեմիրը, նույն կուսակցության անդամ, խորհրդարանի (Բունդեսթագ) պատգամավոր Օզջան Մություն, «Ձախ կուսակցությունից» պատգամավորր Սևիմ Դաղդելենը, գրող Սեյրան Աթեշը, և «Բեռլինի ալևիների միության» փոխնախագահ Նուման Էմրեն:

Նշվում է, որ մեկ օրվա ընթացքում 6000-ից ավել ստորագրություն հավաքած նախաձեռնությունը շարունակվելու է մինչև ապրիլի 16-ը` հանրաքվեի օրը:

Ստորագրահավաքի առթիվ արված հայտարարության մեջ ասվում է, որ բոլոր նրանք, ովքեր ցանկանում են փրկել իրավական պետությունը, իշխանության բաժանումը, մամուլի, խոսքի և հավաքների ազատությունը, ապա պետք է միմիայն «ոչ» քվեարկեն առաջիկա հանրաքվեին:

Կազմակերպիչները մեղադրել են Թուրքիայի նախագահին խորհրդարանի և դատական իշխանության իրավասությունները կրճատելու և ամբողջ ուժը մեկ ղեկավարի ձեռքում կենտրոնացնելու ցանկության մեջ:

«Այս հանրաքվեն Թուրքիայում ժողովրդավարությունը փրկելու համար վերջին շանսն է»,- ասված է հայտարարության մեջ:

Աղբյուր` Ermenihaber.am