ԵԽԽՎ-ում կրկին կքննարկվի Թուրքիային մոնիտորինգի ենթարկելու հարցը

Միջազգային12:50, 16 Մարտ 2017

ԵԽԽՎ-ում կրկին կքննարկվի Թուրքիային մոնիտորինգի ենթարկելու հարցը

Ապրիլի վերջին Ստրասբուրգում կկայանա Եվրոպայի խորհրդի խորհրդարանական վեհաժողովի (ԵԽԽՎ) նիստը: Թուրքական «Hürriyet» թերթի թղթակից Սեդաթ Էրգինի հոդվածի համաձայն՝ նիստի ընթացքում քվեարկության կդրվեն 3 զեկույցներ, որոնց հաստատման դեպքում Թուրքիայում կրկին կարող է վերսկսվել մոնիտորինգի գործընթացը:

Նշված զեկույցները նախապատրաստվել են Վենետիկի հանձնաժողովի կողմից: Դրանցից մեկը վերաբերում է Թուրքիայում ապրիլի 16-ին անցկացվելիք սահմանադրական փոփոխությունների հանրաքվեին և այդ փոփոխություններին ուղղված շատ խիստ քննադատություններ է պարունակում: 30 էջանոց այս զեկույցում հանձնաժողովը Թուրքիայում ակնկալվող փոփոխությունները բնութագրել է որպես «վտանգավոր հետընթաց քայլ՝ սահմանադրական ժողովրդավարական ավանդույթներում»:

Մարտի 10-11-ին Վենետիկում տեղի ունեցած լիագումար նիստի ժամանակ հաձնաժողովը հրապարակել է ևս 2 զեկույց՝ Թուրքիայի դատաիրավական համակարգի և մամուլի ազատության սահմանափակող օրենքի ուժ ունեցող որոշումների վերաբերյալ: Այս զեկույցները ևս զերծ չեն Թուրքիային ուղղված քննադատություններից:

Վենետիկի հանձնաժողովը (պաշտոնական անվանումը՝ «Ժողովրդավարություն՝ իրավունքի միջոցով» եվրոպական հանձնաժողով) ստեղծվել է 1990թ. և համարվում է իրավունքի և ժողովրդավարության ոլորտում ամենահեղինակավոր և անկախ եվրոպական կառույցը: Հանձնաժողովին անդամակցում են 61 երկրներ, այդ թվում՝ նաև Եվրոպայի սահմաններից դուրս (Կանադա, լատինամերիկյան երկրներ):Վենետիկի հանձնաժողովի որոշումներն ու զեկույցները պարտադրող ուժ չունեն, բայց դրանք շատ հեղինակավոր խորհրդի նշանակություն ունեն և որոշիչ դեր կարող են խաղալ այս կամ այն հարցում Եվրոպայի դիրքորոշումների ձևավորման գործում:

Թուրքիան 1996-2004թթ. ենթարկվել է մոնիտորինգի՝ ժողովրդավարական մեխանիզմներից հեռանալու պատճառով: Ներկայումս, փաստորեն, երկիրը կրկին կանգնած է մոնիտորինգի գործընթացի վերսկսման վտանգի առաջ: Թուրքիայում մոնիտորինգի վերսկսման հարցը ԵԽԽՎ-ում քվեարկության էր դրվել նաև 2017թ. հունվարի 23-ին: վեարկությանը մասնակցած 1Ք81 պատգամավորից 94-ը կողմ էր քվեարկել առաջարկին, իսկ 68-ը՝ դեմ, սակայն առաջարկը չընդունվեց, քանի որ գործընթացի վերսկսման համար անհրաժեշտ էր, որ կողմ քվեարկի քվեարկության մասնակիցների 2/3-ը:

Հավելենք, որ ԵԽԽՎ-ում մոնիտորինգի գործընթացը գործարկվել է 1993թ. և նպատակ ունի եվրաինտեգրման ճանապարհն ընտրած երկրներում հեշտացնելու անցումը արևմտյան ժողովրդավարական չափանիշներին: Ներկայումս ԵԽԽՎ մոնիտորինգ է իրականացնում Ալբանիայում, Բոսնիա-Հերցոգովինայում, Մոլդովայում, Ռուսաստանում, Սերբիայում, Ուկրաինայում, Վրաստանում, Հայաստանում և Ադրբեջանում:

Աղբյուր` Ermenihaber.am