ERMENI HABER AJANSI

«2016-ի հուլիսի 15-ին Թուրքիայում տեղի ունեցած հեղաշրջման փորձից հետո ԱՄՆ փոխնախագահ Ջո Բայդենի ու Անգլիայի վարչապետ Թերեզա Մեյի այցերից հետո 3-րդ կարևոր պաշտոնական այցը Գերմանիայի կանցլեր Անգելա Մերկելինն է»,- նկատել է տալիս թուրքական «Yeni Akit» թերթի կայքը` ավելացնելով, որ այցի նպատակը վերջին շրջանում 2 երկրների հարաբերություններում առաջացած լարվածության թոթափումն է լինելու:

Մերկելը նախ այցելելու է Թուրքիայի խորհրդարան, ապա հանդիպելու է նախագահ Ռեջեփ Թայիփ Էրդողանի ու վարչապետ Բինալի Յըլդըրըմի հետ: Հանդիպումների ժամանակ թուրքական կողմն օրակարգ է բերելու ՆԱՏՕ-ում ծառայող բարձրաստիճան թուրք զինվորականների թեման, որոնցից 40-ը Գերմանիայից քաղաքական ապաստան են խնդրել: Նրանց անունները կապվում են Թուրքիայում հուլիսի 15-ի հեղաշրջման փորձը նախաձեռնելու մեջ մեղադրվող Ֆեթուլլահ Գյուլենի ղեկավարած կազմակերպությունների (FETÖ) անդամ լինելու մեջ:

Քննարկվելու է դարձյալ գյուլենականների հետ ասոցացվող ու Թուրքիայում հետախուզվող թուրք դատախազներ Զեքերյա Օզի և Ջելալ Քարայի հարցը, որոնք թուրքական կողմի պնդմամբ ապաստանել են Գերմանիայում:

Թուրքիայում դատական հետապնդումների ենթարկվելու պատճառով Գերմանիայում ապաստանած ու քաղաքացիություն ստացած հայտնի թուրք լրագրող «Cumhuriyet» ընդդիմադիր թերթի նախկին գլխավոր խմբագիր Ջան Դյունդարի թեման նույնպես դուրս չի մնա օրակարգից:

Ըստ աղբյուրի` թուրքական կողմի պահանջների համատեքստում օրակարգ կբերվի նաև «Քուրդիստանի բանվորական կուսակցության» (PKK-ՔԲԿ) Գերմանիայում գտնվող 4.500 ներկայացուցիչների գործը:

Հանդիպումների ժամանակ կխոսվի նաև սահմանադրական փոփոխությունների վերրաբերյալ Թուրքիայում ապրիլին սպասվող հանրաքվեի և Գերմանիայում սեպտեմբերին կայանալիք համապետական ընտրությունների մասին:

Սպասվում է, որ Մերկելը անհանգստություն է հայտնելու քրդամետ «Ժողովուրդների դեմոկրատական կուսակցության» (HDP-ԺԴԿ) պատգամավորների ձերբակալությունների կապակցությամբ և հորդորելու է քրդական հարցը լուծելու համար կրկին հաշտեցման գործընթաց սկսել: