ERMENI HABER AJANSI

Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի առաջին նիստում անցկացված քվեարկությամբ մերժվեց Թուրքիայի վերաբերյալ հատուկ նիստ գումարելու առաջարկը: Թուրքական «Hürriyet» թերթի կայքի տեղեկացմամբ՝ 181 պատգամավորի մասնակցությամբ անցկացված քվեարկության ընթացքում 94 պատգամավոր կողմ է քվեարկել, 68 պատգամավոր՝ դեմ, ևս 19-ը ձեռնպահ է մնացել: Առաջարկի հաստատման համար անհրաժեշտ էր, որ կողմ քվեարկի պատգամավորների 2/3-ը: Այսպիսով, Թուրքիան ժամանակավորապես ազատվեց կրկին մոնիտորինգի ենթարկվելու հեռանկարից:

Աղբյուրի հավաստմամբ՝ «Թուրքիայի ժողովրդավարական կառույցների գործունեությունը» խորագրով հատուկ նիստի չեղարկումը հնարավոր դարձավ ԵԽԽՎ-ում Թուրքիայի պատվիրակության ակտիվ ջանքերի շնորհիվ:

Նշենք, որ Թուրքիան ԵԽԽՎ-ում ներկայացնում են 18 պատգամավոր, որոնցից 11-ը իշխող «Արդարություն և զարգացում» կուսակցության (ԱԶԿ-AKP) ներկայացուցիչներ են, իսկ մյուսները՝ երեք առաջատար ընդդիմադիր կուսակցություններից: Սակայն, հայտնի է, որ առաջիկա ամիսների ընթացքում այս թեման ԵԽԽՎ-ում կրկին կարող է օրակարգ բերվել:

ԵԽԽՎ քաղաքական հարցերի և մոնիտորինգի հանձնաժողովները դեռևս 2016թ. դեկտեմբերի 15-ին դիմում էին ներկայացրել՝ 2017թ. հունվարի 23-27-ին Ստրասբուրգում կայանալիք ԵԽԽՎ լիագումար նիստում Թուրքիայում տեղի ունեցող զարգացումները  որպես «հապշտապ օրակարգային թեմա» քննարկելու առաջարկով:

Եթե այս առաջարկն ընդունվեր, Թուրքիայի վերաբերյալ նիստում քննարկման էր դրվելու «Եվրաինտեգրման գործընթացից բխող պարտականությունների չկատարման համար» 1996-2004թթ. Թուրքիայում կիրառված մոնիտորինգի գործընթացի վերսկսման
հարցը:

Հավելենք, որ ԵԽԽՎ-ում մոնիտորինգի գործընթացը գործարկվել  է 1993թ. և նպատակ ունի եվրաինտեգրման ճանապարհն ընտրած երկրներում հեշտացնելու անցումը արևմտյան ժողովրդավարական չափանիշներին: Ներկայումս ԵԽԽՎ մոնիտորինգ է իրականացնում Ալբանիայում, Բոսնիա-Հերցոգովինայում, Մոլդովայում, Ռուսաստանում, Սերբիայում, Ուկրաինայում, Վրաստանում, Հայաստանում և Ադրբեջանում: