ERMENI HABER AJANSI

Եվրոպայի խորհրդի խորհրդարանական վեհաժողովը (ԵԽԽՎ) նախատեսում է առաջիկայում Թուրքիայի վերաբերյալ հատուկ նիստ գումարել: «Deutsche Welle»-ի թուրքական ծառայության համաձայն՝ նիստի օրակարգում կլինի Թուրքիայում քաղաքական մոնիտորինգի գործընթացի վերականգնման հարցը, որը դադարեցվել էր 2004թ.:

Աղբյուրի տեղեկացմամբ՝ ԵԽԽՎ-ում թուրքական պատվիրակության իշխանական թևը կուլիսներում աշխատանք է տանում մոնիտորինգի հարցի քննարկումը կանխելու համար: Թուրքիան ԵԽԽՎ-ում ներկայացնում են 18 պատգամավոր, որոնցից 11-ը իշխող «Արդարություն և զարգացում» կուսակցության (ԱԶԿ-AKP) ներկայացուցիչներ են, իսկ մյուսները՝ երեք առաջատար ընդդիմադիր կուսակցություններից:

ԵԽԽՎ քաղաքական հարցերի և մոնիտորինգի հանձնաժողովները դեռևս 2016թ. դեկտեմբերի 15-ին դիմում էին ներկայացրել՝ 2017թ. հունվարի 23-27-ին Ստրասբուրգում կայանալիք ԵԽԽՎ լիագումար նիստում Թուրքիայում տեղի ունեցող զարգացումները  որպես «հապշտապ օրակարգային թեմա» քննարկելու առաջարկով:

Դիմումը կքննարկվի հունվարի 23-ին՝ ԵԽԽՎ բյուրոյի նիստում: Եթե բյուրոն հավանություն տա Թուրքիայի վերաբերյալ հատուկ նիստ կազմակերպելուն, ապա հարցը կդրվի քվեարկության ԵԽԽՎ-ի լիագումար նիստում:

Քվեարկությանը մասնակցող անդամների 2/3-ի կողմից հավանության արժանանալու դեպքում հունվարի 26-ին ԵԽԽՎ-ում կգումարվի «Թուրքիայի ժողովրդավարական կառույցների գործունեությունը» խորագրով հատուկ նիստ:

Նմանատիպ նիստեր են գումարվել նաև անցյալ տարվա հունիսին և հոկտեմբերին: Սակայն այս անգամ նիստը կարող է ավարտվել «Եվրաինտեգրման գործընթացից բխող պարտականությունների չկատարման համար» 1996-2004թթ. Թուրքիայում կիրառված մոնիտորինգի գործընթացի վերականգնմամբ:

ԵԽԽՎ-ում մոնիտորինգի գործընթացը գործարկվել  է 1993թ. և նպատակ ունի եվրաինտեգրման ճանապարհն ընտրած երկրներում հեշտացնելու անցումը արևմտյան ժողովրդավարական չափանիշներին: Ներկայումս ԵԽԽՎ մոնիտորինգ է իրականացնում Ալբանիայում, Բոսնիա-Հերցոգովինայում, Մոլդովայում, Ռուսաստանում, Սերբիայում, Ուկրաինայում, Վրաստանում, Հայաստանում և Ադրբեջանում: Եթե Թուքրիայի վերաբերյալ առաջարկը հաստատվի, Թուրքիան կլինի առաջին երկիրը, որտեղ նախկինում դադարեցված մոնիտորինգի գործընթացը կվերսկսվի: