«The Guardian»-ի թղթակից. «Թուրքիայում ժողովրդավարությունը արյունաքամ է լինում»

Հոդված09:17, 18 Հունվար 2017

«The Guardian»-ի թղթակից. «Թուրքիայում ժողովրդավարությունը արյունաքամ է լինում»

Բրիտանական «The Guardian» թերթի վերջին համարում անդրադարձ է կատարվել Թուրքիայում տեղի ուենցող ներքին զարգացումներին: Հեղիանակավոր թերթի թղթակից Օուեն Ջոնսը «Այն ամենը, ինչ տեսա Թուրքիայում, ժողովրդավարության դեմ ուղղված հարձակում է» խորագրով հոդվածում պատմում է այդ երկիր կատարած իր այցի մասին:

Անդրադառնալով տասնյակ հազարավոր քաղաքացիների կալանավորմանն ու մամուլի դեմ կիրառվող ճնշումներին՝ Ջոնսը գրում է. «Արևմուտքն այլևս չի կարող աչք փակել Էրդողանի կիրառած բռնությունների վրա»:

Հեղինակը պատմում է, որ այցելել է Թուրքիայի ընդդիմադիր կուսակցությունների ու թերթերի ներկայացուցիչներին, ակտիվիստներին, որոնք շատ ծանր վիճակում են գտնվում:

«Նրանց քաջությունը ոգեշնչող, իսկ դրությունը մտահոգիչ է»,- գրում է նա:

Բրիտանացի լրագրողը հիշեցնում է, որ Թուրքիայում փակվել է 160 լրատվամիջոց, իսկ 144 լրագրող անազատության մեջ է: Նա անդրադառնում է նաև ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) առաջնորդների և բազմաթիվ անդամների կալանավորման փաստին:

«Թուրքիայի փխրուն ժողովրդավարությունը արյունաքամ է լինում, իսկ արևմտյան երկրները լռում են: Թուրքիայի վիճակը պետք է ազդանշան լինի. ժողովրդավարությունը կարևոր, բայց և շատ խոցելի երևույթ է: Այդ դրությունը մեզ պիտի օգնի գիտակցել, թե որքան դժվարությամբ են ձեռք բերվում իրավունքներն ու ազատությունները և որքան հեշտությամբ են դրանք հետ խլվում ազգային ճգնաժամերից օգտվող ռեժիմների կողմից», - նկատում է Ջոնսը:

Նա մտավախություն է հայտնում, որ Թուրքիայի օրինակը կարող է ոչ թե մնալ որպես բացառություն, այլ վերածվել ժողովրդավարությունը ոչնչացնելու տարածված մեթոդի:

«Նույնիսկ սոսկ այս հանգամանքը պատճառ է, որպեսզի Թուրքիայի կողքին լինենք: Ո՞վ կարող է իմանալ, թե հաջորդը որ երկիրը կլինի», - եզրափակում է հեղինակը:

Աղբյուր` Ermenihaber.am