ERMENI HABER AJANSI

Նոյեմբերի 22-ին Եվրախորհրդարանում (ԵԽ) քննարկման կդրվի Թուրքիայի եվրաինտեգրման գործընթացի կասեցման հարցը: Թուրքական «Gerçek Gündem» լրատվակայքի տեղեկացմամբ՝ հաջորդ օրը՝ նոյեմբերի 23-ին, քվեարկության կդրվի ԵՄ-Թուրքիա  բանակցությունների դադարեցման վերաբերյալ բանաձևը:

ԵԽ-ի սոցիալիստ պատգամավորների կողմից ներկայացված բանաձևն արդեն իսկ արժանացել է լիբերալների աջակցությանը: Այդ պատճառով մեծ է հավանականությունը, որ այն կհաստատվի: Մյուս կողմից քաղաքական շրջանակներում պտտվում է այն կարծիքը, որ  նույնիսկ հաստատվելու դեպքում վերոնշյալ բանաձևը իրավական պարտադրող ուժ չի ունենա և կկրի սիմվոլիկ բնույթ:

Ակնկալվում է, որ առաջարկված բանաձևի քննարկման ժամանակ խիստ քննադատություններ կհնչեցվեն հուլիսի 15-ի հեղաշրջման փորձից հետո Թուրքիայում սահմանված արտակարգ դրության շրջանակներում կիրառվող մեթոդների վերաբերյալ:

Այդ մեղադրանքները մասնավորապես կապված են ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) պատգամավորների, լրագրողների և գրողների կալանավորման, մամուլի նկատմամբ կիրառվող բռնությունների, հիմնարար իրավունքների ոտնահարման բազմաթիվ դեպքերի հետ: Այս համատեքստում որոշ պատգամավորներ կարող են կրկին բարձրանել Թուրքիայի նկատմամբ պատժամիջոցների կիրառման հարցը:

Ակնկալվում է նաև, որ նոյեմբերի 22-ին կայանալիք քննարկման ժամանակ անդրադարձ կկատարվի Թուրքայի վերաբերյալ Եվրահանձնաժողովի տարեկան զեկույցում տեղ գտած խիստ քննադատություններին, ինչպես նաև այդ առթիվ ԵԽ նախագահ Մարտին Շուլցի և զեկուցող Քեթի Փիրիի հասցեին Թուրքիայից հնչեցված պատասխաններին:

Հիշեցնենք, որ օրինախախտումների բազմաթիվ դեպքերի առթիվ Եվրամիության մի շարք բարձրաստճան պաշտոնյաներ բազմիցս Թուրքիայի հետ բանակցությունների դադարեցմանն ուղղված կոչեր են հնչեցրել: Նշվել է նաև, որ մահապատժի վերականգնման դեպքում կհատվի այն կարմիր գիծը, որից հետո Թուրքիայի եվրաինտեգրման գործընթացը սառեցումը անխուսափելի կլինի: