Ստոլտենբերգն անդրադարձել է ՆԱՏՕ-ի կազմում ծառայող թուրք զինվորների տարբեր երկրներից քաղաքական ապաստան խնդրելուն

Միջազգային08:18, 19 Նոյեմբեր 2016

Ստոլտենբերգն անդրադարձել է ՆԱՏՕ-ի կազմում ծառայող թուրք զինվորների տարբեր երկրներից քաղաքական ապաստան խնդրելուն

ՆԱՏՕ-ի գլխավոր քարտուղար Յենս Ստոլտենբերգը հաստատել է այն լուրը, ըստ որի, տարբեր երկրներում տեղակայված ՆԱՏՕ-ի ստորաբաժանումներում ծառայող թուրք զինվորականները քաղաքական ապաստան ստանալու խնդրանքով դիմում են այդ երկրների ղեկավարությանը:

Ըստ թուրքական «Doğan» լրատվական գործակալության` Ստոլտենբերգը հայտարարել է, որ դաշինքի (ՆԱՏՕ) անդամ հանդիսացող այդ երկրների` թուրք զինվորականների դիմումները քննող ծառայությունները լիակատար անկախ են որոշում կայացնելիս: Բարձրաստիճան պաշտոնյան կոչ է արել Թուրքիային հարգել օրենքի գերակայությունը, չկոնկրետացնելով, սակայն, այն հանգամանքները, որոնք թուրք զինվորականների մեջ հայրենիք չվերադառնալու ցանկություն են առաջացնում:

Հյուսիսատլանտյան դաշինքի գլխավոր քարտուղարը հայտնել է նաև, որ կիրակի օրը դաշինքի վեհաժողովի աշխատանքներին մասնակցելու նպատակով մեկնելու է Ստամբուլ, որտեղ էլ կքննարկվեն վերոնշյալ հարցերը:

Հիշեցնենք, որ օրեր առաջ Գերմանիայի Ռայնլանդ Պֆալց (Rheinland-Pfalz) նահանգի Կայզերսլաութեն քաղաքի մոտակայքում գտնվող ՆԱՏՕ-ի ռազմաբազայում ծառայող թուրք զինվորականները դիմել էին Գերմանիայից քաղաքական ապաստան ստանալու խնդրանքով:

Կայզերսլաութենի քաղաքային իշխանության ներկայացուցիչներից մեկը, հարցազրույց տալով գերմանական «SVR» լրատվական գործակալությանը, հայտնել էր, որ այդ դիմումներն ուսումնասիրվում են միգրացիայի դաշնային ծառայություն կողմից:

Թուրք զինվորականները քաղաքական ապաստան խնդրելու համար որպես հիմնավորում էին ներկայացնել հուլիսի 15-ի հեղաշրջման փորձից հետո Թուրքիայում ստեղծված քաղաքական իրավիճակը:

Գերմանիայում գտնվող ՆԱՏՕ-ի ռազմաբազայում ծառայություն են իրականացնում 30-40 թուրք զինվորականներ, որոնց գործուղման ժամկետը մոտենում է ավարտին:

Աղբյուր` Ermenihaber.am