Եվրոպայում Թուրքիայի եվրաինտեգրումը այնքան էլ հավանական ու ցանկալի չեն համարում

Միջազգային12:06, 29 Օգոստոս 2016

Եվրոպայում Թուրքիայի եվրաինտեգրումը այնքան էլ հավանական ու ցանկալի չեն համարում

Ավստրիայի փոխվարչապետ և էկոնոմիկայի նախարար Ռայնհոլդ Միտերլեհները հայտարարել է, որ իրենք դեմ են Թուրքիայի եվրաինտեգրման բանակցություններին: Թուրքական «Türkiye» թերթի կայքի տեղեկացմամբ՝ Միտերլեհները նշել է, որ Թուրքիան մոտ ապագայում պատրաստ չէ Եվրամիության անդամ դառնալուն: Նա առաջարկել է անդամակցության բանակցությունների փոխարեն շեշտը դնել Եվրամիության (ԵՄ) և Թուրքիայի միջև ընդհանուր շահերի վրա հիմնված համագործակցություն վրա:

«Սակայն Թուրքիան պետք է շարունակի լինել կարևորագույն տարածաշրջանային և տնտեսական գործընկեր: Դա ավելի տրամաբանական ու իրատեսական է, քան անվերջ փայփայել անդամակցության ուտոպիստական հույսը», - ասել է «Ավստրիայի ժողովրդական կուսակցության» (ÖVP) առաջնորդ Մետերլեհները:

Ավստրիացի նախարարը նշել է, որ իրենց մշակած առաջարկը ներկայացվելու է «Ավստրիայի սոցիալ-դեմոկրատական կուսակցությանն» («SPÖ») ու Եվրամիության ներկայացուցիչներին:

Իսկ Գերմանիայի փոխվարչապետ Սիգմար Գաբրիելը տեսակետ է հայտնել, որ մոտ ապագայում Թուրքիան Եվրամիության անդամ չի դառնա: Ըստ գերմանացի պաշտոնյայի՝ եթե անգամ Թուրքիան անմիջապես կատարի այս համատեքստում իր ստանձնած բոլոր պարտավորությունները, ԵՄ-ն, միևնույնն է, չի կարող նրան ընդունել որպես միության անդամ:

Ընդգծելով, որ Թուրքիայի բնակչությունը շատ մեծ թիվ է կազմում՝ Գաբրիելը հավելել է. «Եթե անգամ դուք շատ լավատես լինեք իմ քաղաքական կարիերայի տևողության հարցում, միևնույնն է, ես չեմ կարող տեսնել ԵՄ անդամ դարձած Թուրքիան: Այս պահի դրությամբ մենք նույնիսկ մեկ քաղաք-պետություն չենք կարող ընդունել միություն»:

Աղբյուր` Ermenihaber.am