Թուրք հայտնի լրագրող. «Ռուսական ինքնաթիռի խոցման օրը Թուրքիան պատրաստվում էր մտնել Սիրիա»

Հոդված07:53, 23 Օգոստոս 2016

Թուրք հայտնի լրագրող. «Ռուսական ինքնաթիռի խոցման օրը Թուրքիան պատրաստվում էր մտնել Սիրիա»

Թուրքական քաղաքական կուլիսներում կատարվող իրադարձություններին միշտ քաջատեղյակությամբ հայտնի «Hurriyet» թերթի հայտնի հոդվածագիր, լրագրող Աբդուլքադիր Սելվին թերթում հրապարակած հոդվածում ուշագրավ պնդում է արել թուրքական ԶՈւ-ի կողմից ռուսական օդանավի խոցման վերաբերյալ:

Ըստ Սելվիի` ռուսական ռազմական ինքնաթիռի խոցման օրը` 2015-ի նոյեմբերի 24-ին, Թուրքիան պատրաստվում էր ցամաքային զորք մտցնել սիրիական սահմանային Ջերաբլուս քաղաք, սակայն ինքնաթիռի միջադեպից հետո ստիպված չեղյալ է հայտարարել այդ որոշումը: Հոդվածագրի խոսքով թուրքական կողմի` նախօրոք ԱՄՆ-ի հետ համաձայնեցրած Սիրիա մտնելու պլանը հետևյալն էր. Թուրքական ցամաքային զորքերը սիրիական զինված ընդդիմության հետ միասին գրոհով պետք է վերցնեին Ջերաբլուսը: ԱՄՆ-ը այդ գործողությանը պետք է օդային աջակցություն ցուցաբերեր: Իսկ ջերաբլուսը «Իսլամական պետություն» ահաբեկչական կազմակերպության զինյալներից գրավելուց հետո Թուրքիան այնտեղ պետք է հիմներ անվտանգության գոտի:

Սելվին նշում է, որ գործողության մասին տեղեկացվել է նաև Ռուսաստանի նախագահ Վլադիմիր Պուտինը G-20- գագաթաժողովին մասնակցելու նպատակով Անթալիա կատարած այցի ընթացքում: «Մենք բարձրաձայն կքննադատանեք այդ քայլը, սակայն շատ չենք կենտրոնանա դրա վրա»,- ըստ հոդվածագրի` համաձայնել էր Պուտինը:

Շարունակելով միտքը` Սելվին գրում է. «Այժմ մի կողմ թողնենք այն հանգամանքը, որ ինքնաթիռի խոցման հետևանքով տապալվեց Ջերաբլուսի օպերացիան: Միջադեպից հետո մենք այլևս չկարողացանք թռիչքների իրականացնել Սիրիայի օդային տարածքում»:

Վերջում հոդվածագիրն ավելացնում է, որ վերջին օրերին Թուրքիան կրկին պատրաստվել էր նույն գործողությանը, սակայն այս անգամ էլ այն հետաձգվեց կամ չեղարկվեց օգոստոսի 20-ին Գազիանթեպում (Այնթապ) տեղի ունեցած ահաբակչության պատճառով, որին զոհ գնաց 53 խաղաղ բնակիչ:

Աղբյուր` Ermenihaber.am