Հայկո Բաղդատ. «Երբ բռնություններ են կատարվում, ես պետության կողքին չեմ կարող լինել»

Հասարակական07:51, 19 Մայիս 2016

Հայկո Բաղդատ. «Երբ բռնություններ են կատարվում, ես պետության կողքին չեմ կարող լինել»

Պոլսահայ լրագրող Հայկո Բաղդատը հարցազրույց է տվել գյուլենականներին նոր թերթին՝ «Yarına Bakış»: Հարցազրույցի ժամանակ Բաղդատը խոսել է գյուլենական համայնքի հետ իր կապի մասին:

«Դուք և՛ հայ եք, և՛ գյուլենական: Ինչպե՞ս եք գյուլենական դարձել» հարցին, Բաղդատը պատասխանել է, որ գյուլենական լինելու համար պետք է նախևառաջ մահմեդական դառնա: Բաղդատի խոսքերով տարբեր ժամանակներ իրեն տարբեր անուններով են պիտակել.

«Գեզիի ցույցերի ժամանակ ինձ ազգայնական էին անվանում, քրդերի իրավունքները պաշտպանելու համար մեղադրեցին PKK -ական («Քուրդիստանի բանվորական կուսակցություն») լինելու մեջ, իսկ այսօր կատարվող բռնությունների դեմ խոսելու համար ինձ գյուլենական են անվանում»:

Հիշեցնելով, որ գյուլենական դառնալու համար անհրաժեշտ է մահմեդական դառնալ, Բաղդատն ասել է. «Ես գյուլենականների հանդեպ կատարվող բռնություններին դեմ եմ, սակայն մի ձեռքով էլ Հրանտ Դինքի սպանության գործով մեղադրվող գյուլենական Ալի Ֆուաթ Յըլմազերի և Ռամազ Աքյուրեքի օձիքից եմ բռնել: Հնարավոր չէ արդարացնել մանկապարտեզ ներխուժումը, երեխաների պահարանների խուզարկությունը, ընկերությունների բռնազավթումը, դպրոցների, հիվանդանոցների փակումը, մարդկանց արդար աշխատանքն ուտելը: Երբ այդպիսի բռնություններ են կատարվում, ես պետության կողքին չեմ կարող լինել: Սա ինձ երբեմն գյուլենական, երբեմն PKK-ական, երբեմն էլ չգիտեմ՝ «ինչական» է դարձնում»:

Նշենք, որ գյուլենական կոչվող իսլամական շարժումը (համայնք) գլխավորում է ամերիկաբնակ թուրք միլիարդատեր Ֆեթուլլահ Գյուլենը: Շարժումն ունի հարյուրավոր դպրոցներ, հիվանդանոցներ, համալսարաններ, հիմանդրամներ, ինչպես նաև մի շարք լրատվամիջոցներ աշխարհի բազմաթիվ մահմեդական երկրներում: Շարժումը քարոզում է իսլամական չափավորություն, հանդուրժողականություն, միջկրոնական երկխոսութուն, իսլամի և ժողովրդավարության համատեղելիություն:

Գյուլենականները համարվել են Թուրքիայում իշխող «Արդարություն և զարգացում» կուսակցության քաղաքական հենարանը մինչև 2013թ. դեկտեմբերի 17-ը, երբ Թուրքիայում իրկանացված հակակոռուպցիոն խոշոր օպերացիան ի ցույց դրեց իշխանությունների և գյուլենական համայքնի միջև առկա հակամարտությունը:

Իշխանական մամուլի կողմից շարժումը հայտարարվեց ահաբեկչական, իսկ շարժման առաջնորդ՝ Ֆեթուլլահ Գյուլենի անունը հայտնվեց ներքին գործերի նախարարության հրապարակած Թուրքիայի կողմից հետախուզվող ահաբեկչների ցուցակում:

Աղբյուր` Ermenihaber.am