ERMENI HABER AJANSI

Թուրքիայի բնակչությունը հետզհետե ծերանում է: Թուրքական «TRT Haber» լրատվականի համաձայն՝ տարեցները 2015թ. կազմել են այս երկրի բնակչության ընդհանուր թվի 8.2 տոկոսը, ինչը 0.2 տոկոսով ավելին է 2014թ. ցուցանիշից:

Թուրքիայի վիճակագրական ընկերությունը (TÜİK) հրապարակել է «Ծերության վիճակագրություն» թեմայով իր հաշվետվությունը, որի համաձայն՝ երկրում 65 տարեկանից բարձր 6.495.239 քաղաքացի է բնակվում: Ընդ որում, տարեց բնակչության 43.8 տոկոսը տղամարդիկ են, 56.2 տոկոսը՝ կանայք:

Թուրքիայի շրջաններից ամենածեր բնակչությունն ունի Սինոփը: Իսկ ամենաքիչ տաեց բնակչություն ունեցող նահանգները Հաքքարին և Շըրնաքն են:

100 տարեկանից բարձր տարիքի բնակչությունը 2015թ. կազմել է 5.293: Ընդ որում, 100 և բարձր տարիքի քաղաքացիները ամենից շատ բնակվում են  Ստամբուլում (675 մարդ) , Իզմիրում (236 մարդ) և Անկարայում (234 մարդ):

Իսկ ողջ աշխարհի մասշտաբով 2015թ. գրանցված տվյալներով տարեցները կազմում են բնակչության 8.5 տոկոսը: Ամենածեր բնակչություն ունեցող երկրներն են ըստ հերթականության՝ Մոնակոն (30.4 տոկոս) , ճապոնիան ( 26.6 տոկոս) և Գերմանիան (21.5 տոկոս): Թուրքիան 167 երկրներից բաղկացած այս ցուցակում 66-րդ տեղն է զբաղեցնում: