Էրդողանի այցը Ադրբեջան չեղարկվել է, Ալիևն ինքն է մեկնել Անկարա

Քաղաքական09:02, 15 Մարտ 2016

Էրդողանի այցը Ադրբեջան չեղարկվել է, Ալիևն ինքն է մեկնել Անկարա

2016 թվականի մարտի 13-ին Անկարայում տեղի ունեցած ահաբեկչությունից հետո Ադրբեջանի Գանձակ քաղաքում նախատեսված նախագահներ Ռեջեփ Թայիփ Էրդողանի ու Իլհամ Ալիևի ղեկավարությամբ անցկացվելիք Թուրքիա-Ադրբեջան բարձր մակարդակով ռազմավարական համագործակցության խորհրդի նիստը կանցկացվի Թուրքիայի մայրաքաղաքում:

Ըստ թուրքական «Ensonhaber.com» լրատվական կայքի` հանդիպումը Թուրքիայում անցկացնելու որոշումը կայացրել է Իլհամ Ալիևը:

Աղբյուրը հիշեցրել է, որ արդեն 2-րդ անգամ չի կայանում Էրդողանի Ադրբեջան նախատեսված այցը: Փետրվալի 18-ին նախատեսված այցն էլ չեղարկվել էր դրանից մեկ օր առաջ Անկարայում տեղի ունեցած ահաբեկչական պայթյունի պատճառով:

Ալիև-Էրդողան առանձնազրույցի օրակարգի գլխավոր թեման կլինի տրանսանատոլական գազատարի (TANAP) նախագծի աշխատանքներն արագացնելու հարցը:

Նշենք, որ տրանսանատոլական գազատարն ադրբեջանական «Շահդենիզ 2» և կասպիցծովյան մի քանի այլ հանքավայրերից արդյունահանվող գազը Վրաստանի և Թուրքիայի տարածքով տեղափոխելու է Եվրոպա: Միևնույն ժամանակ Թուրքիան լինելու է ոչ միայն տարանցիկ երկիր, այլ նաև գազը սպառող երկրներից մեկը:

Աղբյուր` Ermenihaber.am