Թուրք պրոֆեսոր. «Թուրքիայում ավարտվել է նեո-օսմանական և իսլամիստական քաղաքականությունը»

Քաղաքական09:45, 24 Փետրվար 2016

Թուրք պրոֆեսոր. «Թուրքիայում ավարտվել է նեո-օսմանական և իսլամիստական քաղաքականությունը»

Անկարայի «Մերձավոր Արևելքի տեխնիկական համալսարանի» միջազգային հարաբերությունների ամբիոնի պրոֆեսոր Հուսեյին Բաղջըն, անդրադառնալով վերջին շրջանում Թուրքիայի որդեգրած արտաքին քաղաքականությանը, ասել է, որ նեո-օսմանական և իսլամիստական քաղաքականությունն այլևս դադարել է Թուրքիայի արտաքին քաղաքականության անփոփոխ առաջնահերթությունը լինելուց:

«Sputnik»- լրատվական ցանցի թուրքական ծառայությանը տված հարցազրույցում պրոֆեսորը մասնավորապես ասել է. «Նեո-օսմանական և իսլամիստական քաղաքականությունն այլևս դադարել է Թուրքիայի արտաքին քաղաքականության անփոփոխ առաջնահերթությունը լինելուց: Արտաքին քաղաքականության մեջ մի ամբողջ ժամանակաշրջան վատնվել է: Թուրքիայում արդեն ավարտվել է «հերոսական գրականության» ժամանակաշրջանը: Հիմա իրականությունը տեսնելու ժամանակն է»:

Բաղջըն մատնանշել է հատկապես մերձավորարևելյան քաղաքականության մեջ կատարված սխալները. «Ամենամեծ խնդիրը Թուրքիայի մեկուսացման վտանգն է: Ահաբեկչությունը կրկին դարձել է երկրի առջև ծառացած ամենամեծ խնդիրը: Աշխարհը ևս մտահոգ է այս հարցում: Եվրոպայում փորձագետների մեծամասնությունը համարում է, որ Թուրքիայի բոլոր խնդիրների հիմքը քրդական հարցն է: Եթե նույնիսկ այս տեսակետը սխալ է, միևնույնն է, Եվրոպայում դա է գերիշխում: Թուրքիայի մերձավորարևելյան քաղաքականությունը սպառել է իրեն: Այժմ իրավիճակը փրկելու ժամանակն է»:

Եզրափակելով խոսքը` Բաղջըն ասել , որ պատմությունը ցույց է տալիս, որ բոլորի հետ վիճելը հասարակությունների կյանքում աղետներ է ծնում:

Աղբյուր` Ermenihaber.am