Անկարայի պայթյունի պատճառով Էրդողանը հետաձգել է Ադրբեջան կատարելիք իր այցը

Քաղաքական06:48, 18 Փետրվար 2016

Անկարայի պայթյունի պատճառով Էրդողանը հետաձգել է Ադրբեջան կատարելիք իր այցը

Թուրքիայի նախագահ Ռեջեփ Թայիփ Էրդողանը հայտարարությամբ է հանդես եկել Անկարայի Ինոնյու պողոտայում փետրվարի 17-ի երեկոյան տեղի ունեցած ահաբեկչության վերաբերյալ:

Թուրքական «Haberler.com» լրատվակայքի համաձայն՝ Էրդողանը մասնավորապես ասել է. «Մեր ունեցած կորուստները սպառում են մեր համբերությունը: Պետք է հիշել, որ Թուրքիան միշտ և ամեն տեղ օգտվելու է օրինական պաշտպանության իր իրավունքից»:

Թուրքիայի նախագահը շեշտել է, որ իրենք ավելի ուժգին և վճռական են պայքարելու նման անմարդկային հարձակումներ իրականացնողների և նրանց թիկունքում գտնվող ուժերի դեմ: Հավաստիացրել է, որ ահաբեկչական խմբավորումների օգնությամբ Թուրքիան մասնատել ցանկացող ուժերը չեն հասնելու իրենց բաղձալի նպատակին:

«Որքան էլ տառապենք այս և նախորդ ահաբեկչությունների ժամանակ մեր ունեցած կորուստների պատճառով, մեկ է, այս ամենն ավելի է մեծացնում պայքարելու և ավելի շատ ջանք թափելու մեր նպատակադրվածությունը»:

Անկարայի պայթյունի պատճառով Էրդողանը հետաձգել է փետրվարի 18-ին նախատեսված իր այցը Ադրբեջանը: Տեղի ունեցած ահաբեկչությունից հետո Թուրքիայի նախագահը հեռախոսազրույց է ունեցել Իլհամ Ալիևի հետ և տեղեկացրել, որ այցը ժամանակավորապես հետաձգվում է: Էրդողանի այցը նախատեսված էր «Թուրքիա-Ադրբեջան. բարձր մակարդակի ռազմավարական համագործակցության խորհրդի» 5-րդ նիստի շրջանակներում:

Իսկ վարչապետ Ահմեթ Դավութօղլուն հետաձգել է Բրյուսել կատարելիք իր այցը:

Հիշեցնենք, որ փետրվարի 17-ի երեկոյան՝ տեղական ժամանակով 18:30-ին Անկարայի Ինոնյու պողոտայում զինվորականներին տեղափոխող ավտոբուսների կողքին հայտնված մի ավտոմեքենա էր պայթեցել: Պաշտոնապես հայտարարվել է 28 զոհի և 61 վիրավորի մասին:

Աղբյուր` Ermenihaber.am