ERMENI HABER AJANSI

Թուրքիայի ղեկավարությունը Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թևը հանդիսացող «Ժողովրդի պաշտպանության ուժերի» (ԺՊՈւ -YPG)` Սիրիայի Ազազ շրջանի հարավային հատվածում գտնվող դիրքերը հրետակոծելու համար ներկայացրել 3 պատճառ:

Ըստ «Haberler.com» լրատվական կայքի` Թուրքիան Գերմանիայի կանցլեր Անգելա Մերկելին և ԱՄՆ-ի փոխնախագահ Ջո Բայդենին փոխանցած տեղեկություններում իր գործողություններն արդարացրել է ներքոնշյալ 3 հիմնավորումներով.

1. ԺՄԿ-ի և Ասադի ուժերը, շարժվելով դեպի Ազազ, ցանկանում են գաղթականների մի նոր ալիք ուղղել դեպի Թուրքիա, քանի որ Սիրիայի Ազազ և Թուրքիայի Քիլիս շրջանների միջև ընկած 8 կիլոմետրանոց հատվածում փախստականների 10 ճամբար կա: Եթե Ազազն անցնի ԺՄԿ-ի կամ Ասադի վերահսկողության տակ, ապա այդ ճամբարներում գտնվող մարդիկ կշարժվեն դեպի Թուրքիա: Այդ պատճառով Ազազի` ընդդիմադիրների վերահսկողության տակ մնալը կենսական նշանակություն ունի:

2. Քրդերի գործողություններն ուղղված չեն «Իսլամական պետություն» ահաբեկչական կազմակերպության (ԻՊ) դեմ, քանի որ ԺՄԿ-ի գրոհած շրջաններում ԻՊ-ի զինյալներ չկան: ԺՄԿ-ն հարձակվում է ԻՊ-ի դեմ պատերազմող ընդդիմադիր ուժերի վրա, որոնք ցանկանում են շարժվել դեպի արևելք: Մինիղ օդանավակայանը մինչև ԺՄԿ-ի ձեռքն անցնելը գտնվում էր ընդդիմադիրների վերահսկողության տակ:

3. ԺՄԿ-ն տարածքներ գրավելու նպատակ է հետապնդում: Ազազի շրջակայքում էլ ցանկանում է անել այն, ինչն արեց Թել Աբյադ քաղաքի դեպքում: Թել Աբյադը ԺՄԿ-ի կողմից գրավվելու ժամանակ քաղաքից 24 հազար մարդ գաղթեց Թուրքիա: Նրանցից 4 հազար քրդերը վերադարձան, իսկ 20 հազար արաբները մնացին Թուրքիայում, ինչն էլ փոխեց Թել Աբյադի ժողովրդագրական պատկերը:

Թուրքիայի ղեկավարությունը հերքում է այն լուրերը, համաձայն որոնց թուրքական զինուժի հրետակոծությունն ուղղված է քուրդ ժողովրդի դեմ: Աղբյուրը նշում է, որ թուրքական ղեկավարությունը այս տեսակետին հակառակ օրինակ է բերում այն, որ վերջին 1 շաբաթվա ընթացքում 40 թուրքական բեռնատարներ դեղորայք և շինարարական նյութեր են տեղափոխել Սիրիայի քրդաբնակ Քոբանի քաղաք: