ERMENI HABER AJANSI

Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդական ինքնապաշտպանական ջոկատներ»-ի (ԺԻՋ-YPG) հրամանատար Բոզանը սպառնացել է Թուրքիային:

Ըստ թուրքական «Internethaber» լրատվական կայքի` նա թուրքական «Aksiyon» հանդեսին հարցազրույց տալու ժամանակ նշել է, որ այն, ինչ այժմ տեղի է ունենանոմ Սիրիայի հյուսիսի քրդաբնակ Ռոժավա շրջանում, նույնը տեղի է ունենալու Թուրքիայում:

«Մեզ մի փոքր ժամանակ է հարկավոր: Օգնության ենք հասնելու Թուրքիայում գործող «Հայրենասեր հեղափոխական երիտասարդության շարժմանը» (YDG-H):

Միջանկյալ նշենք, որ YDG-H-ն «Քուրդիստանի բանվորական կուսակցության » (ՔԲԿ-PKK)  երիտթևն է:

Թուրքական կայքը նշում է, որ վերոնշյալ թուրքական հանդեսը, որին հարցազրույց է տվել ԺԻՋ-ի հրամանատարը,  մոտ է կանգնած ԱՄՆ-ի Փենսիլվանիա նահանգում  բնակվող  իսլամի քարոզիչ Ֆեթուլահ Գյուլենին ու նրա հետևորդներին:

Թուրքական աղբյուրը հիշեցնում է, որ նախկինում նույն «Aksiyon» հանդեսին հարցազրույց տված ԺԻՋ-ի մեկ այլ ջոկատներից մեկի հրամանատար` 23-ամյա Ռոջին Դերիքը, խոսելով Թուրքիայի նախագահ Ռեջեփ Թայիփ Էրդողանի  հայտարարության այն մասին, թե Թուրքիան երբեք թույլ չի տա, որ քրդական ուժերն անցնեն Եփրատ գետի արևմտյան ափը, ասել է. «Էրդողանը միշտ նմանատիպ բաներ է ասում: Ավելի վաղ էլ ասում էր, որ Եփրատի արևմտյան ափը չեք անցնելու: Մենք այնտեղ մեր կյանքն ենք զոհում: Իրենք Ջերաբլուսը իրենց տարածքն են համարում: Սակայն դա Ռոժավայի մի մասն է»:

Նա նաև հավելել է, որ  իրենց ուժերը «Իսլամական պետություն» (ԻՊ) ահաբեկչական կազմակերպության  դեմ տեղի ունեցած վերջին բախումների ժամանակ հաջողություններ են արձանագրել: