Լեյլա Զանան Էրդողանի հետ հանդիպմանը առաջ է քաշելու քրդական հարցի լուծման 3 պայման

Քաղաքական08:26, 27 Հունվար 2016

Լեյլա Զանան Էրդողանի հետ հանդիպմանը առաջ է քաշելու քրդական հարցի լուծման 3 պայման

Թուրքիայի ընդդիմադիր քրդամետ «Ժողովուրդների դեմոկրատական կուսակցության» (ԺԴԿ-HDP) անդամ Լեյլա Զանան հայտարարել է, որ Թուրքիայի նախագահ Ռեջեփ Թայիփ Էրդողանի հետ տեղի ունենալիք հանդիպման ժամանակ քրդական հարցի լուծման համար առաջ է քաշելու 3 պայման:

Թուրքական «haberler» լրատվական կայքի իրազեկմամբ` հանդիպումը տեղի է ունենալու Զանայի ցանկությամբ: Նշվում է, որ Զանայի 3 պահանջներն են լինելու.

1. Ցմահ ազատազրկման դատապարտված քրդերի առաջնորդ Աբդուլլահ Օջալանի առաջ քաշած պայմանների վերանայման և թուրք-քրդական բանակցությունների վերսկսման համար անհրաժեշտ է պայմանների, ինչպես նաև առողջ հարթակի ստեղծում:

2. Քրդական հարցի խաղաղ լուծումը հնարավոր կլինի, եթե քրդերի օրինական իրավունքները և պահանջները սահմանադրորեն երաշխավորվեն: Եվ եթե Թուրքիայի իշխանությունները ցանկանում են քրդերի հետ ազատ անկախ և դեմոկրատական միջավայրում ապրել, ապա դրա միակ ճանապարհն այն է, որ քուրդ ժողովուրդը տեր կանգնի իր վարչական և քաղաքական կարգավիճակին:

3. Նույնը պետք է տեղի ունենա Սիրիայի հյուսիսի քրդաբնակ Ռոժավա շրջանում: Պետությունները պետք է հրաժարվեն իրենց անհասկանալի և կոշտ դիրքորոշումներից: Նրանք պետք է հարգանք ցուցաբերեն ժողովուրդների քաղաքական կամքի նկատմամբ:

Հավելենք, որ Լեյլա Զանան ազգությամբ քուրդ իրավաբան է, որը նախկինում` Թուրքիայի խորհրդարանի պատգամավոր: Զանան իր քաղաքական գործունեության ժամանակ 1994թ. մեղադրվել է պետական դավաճանության, ինչպես նաև Թուրքիայի խորհրդարանում երդման արարողությունը քրդերենով կարդալու մեջ և դատապարտվել 15 տարվա ազատազրկման:

Աղբյուր` Ermenihaber.am