Թուրքիան կարգավորում է Իսրայելի հետ հարաբերությունները

Քաղաքական13:42, 18 Դեկտեմբեր 2015

Թուրքիան կարգավորում է Իսրայելի հետ հարաբերությունները

Թուրքիան և Իսրայելը հարաբերությունները կարգավորելու շուրջ նախնական համաձայնության են եկել: Թուրքական ընդդիմադիր «Zaman» թերթը, հղում անելով իսրայելացի մի պաշտոնյայի հայտարարությանը, գրում է, որ Իսրայելը «Մավի Մարմարա» նավի վրա հարձակման ժամանակ հասցված վնասների դիմաց 20 միլիոն դոլար փոխհատուցում կվճարի Թուրքիային: Գումարը կփոխանցվի հարձակման ժամանակ զոհվածների և վիրավորների հարազատների համար ստեղծված հիմնադրամին: Հարաբերությունների խզումից հետո հետ կանչված դեսպանները կվերադառնան իրենց պաշտոններին:

Թուրքական պարբերականի պնդմամբ` Թուրքիան համաձայնվել է երկրում սահմանափակել Գազայի հատվածում իշխող «ՀԱՄԱՍ» պաղեստինյան իսլամական խմբավորման գործունեությունը, իսկ խմբավորման բարձրաստիճան պաշտոնյաներից Սալիհ էլ Արուրիին վտարել երկրից:

Ըստ աղբյուրի` համաձայնագրի վերջնական տեքստը ստորագրելուց հետո երկու երկրները միասին կզբաղվեն բնական գազի որոնման աշխատանքներով: Թուրքիան Իսրայելից գազը և՛ կգնի, և խողովակաշար կկառուցի այն Եվրոպա արտահանելու համար:

Թուրքական աղբյուրը ուշադրություն է հրավիրում այն հանգամանքի վրա, որ համաձայնագրում Գազայի հատվածի ապաշրջափակման մասին որևէ պահանջ չկա, չնայած Թուրքիան երկար ժամանակ համառ պայքար էր մղում դրա համար: Նշվում է, որ հարաբերությունների կարգավորման շուրջ գաղտնի բանակցությունները, որոնք ընթացել են Ցյուրիխում, վարել են Իսրայելի գաղտնի ծառայության՝ «Մոսադի» ղեկավար Յոսսի Քոհենը և Թուրքիայի արտգործնախարարի առաջին տեղակալ Ֆերուդին Սինիրօղլուն:

Հիշեցնենք, որ Թուրքիայի և Իսրայելի հարաբերությունները սրվել էին «Մավի Մարմարա» նավի միջադեպից հետո: Իսրայելցի զինվորները 2010 թ-ի մայիսի 31-ին հարձակվել էին թուրքական «Մավի Մարմարա» նավի վրա, որը միջազգային մարդասիրական նավաշարասյան կազմում օգնություն էր փոխադրում Պաղեստինի Գազայի հատված: Թել Ավիվը պահանջել էր նավի վրա բեռների ստուգում անցկացնել: Երբ նավի անձնակազմը հրաժարվել էր ենթարկվել պահանջին, իսրայելցի զինվորների հարձակման էին անցել: Հարձակման հետևանքով զոհվել էր Թուրքիայի 9 քաղաքացի:

Աղբյուր` Ermenihaber.am