ERMENI HABER AJANSI

Թուրքիայի վիճակագրական ծառայության (ԹՎԾ-TÜİK) հրապարակած տվյալների համաձայն՝ 2015թ. օգոստոսին Թուրքիայում գործազրկությունը հասել է 10.1 տոկոսի: Թուրքական «Habertürk» լրատվական կայքի տեղեկատվության համաձայն՝ ոչ գյուղատնտեսական ոլորտի գործազրկությունը աճել է 0.1 տոկոսով՝ կազմելով 12.4 տոկոս (նշենք, որ բոլոր զարգացած երկրներում որպես գործազրկության ցուցանիշ է ընդունվում հենց այս ոլորտում գրանցված ցուցանիշը):

Ըստ ստացված տվյալների՝ 2015թ. նշյալ ժամանակահատվածում 15 տարեկանից բարձր տարիքային խմբում գործազուրկների թիվը նախորդ տարվա համեմատ աճել է 114.000-ով՝ կազմելով 3.6 մլն, իսկ մասնավորապես 15-24 տարիքային խմբում գործազրկությունը 0.6 տոկոսով նվազել է՝ կազմելով 18.3 տոկոս: 15-64 տարիքային խմբում գործազրկության ցուցանիշի փոփոխություն չի գրանցվել, այս ցուցանիշը մնացել է նույնը՝ 10.3 տոկոս:

Նշվում է նաև, որ այս շրջանում աշխատանք ունեցողների 22.2 տոկոսը աշխատում է գյուղատնտեսության ոլորտում, 19.3-ը՝ արդյունաբերության, 7.5-ը՝ շինարարության և 51 տոկոսը՝ սպասարկման ոլորտում: Նախորդ տարվա տվյալների համեմատ սպասարկման ոլորտում աշխատողների թիվն աճել է 0.6 տոկոսոսվ, գյուղատնտեսության ոլորտում՝ 0.1 տոկոսով, շինարարության ոլորտում որևէ փոոփոխություն չի գրանցվել, իսկ արդյունաբերության ոլորտում 0.7 տոկոսով նվազել է:

Նշենք , որ 2015թ. մարտից հետո Թուրքիայում գործազրկության տոկոսն առաջին անգամ է հատում 10 տոկոսի սահմանը: Մարտ ամսին գրանցվել էր գործազրկության 10.6 տոկոս, ինչից հետո՝ մինչև հուլիս այս ցուցանիշը չէր գերազանցել 9.8 տոկոսը: Իսկ այս տարվա ամենաբարձր գործազրկության ցուցանիշը գրանցվել էր հունվար (11.3 տոկոս) և փետրվար (11.2 տոկոս) ամիսներին: