Թուրքիայում 10 ժամում 5 երկրաշարժ է գրանցվել

Տարածաշրջան07:41, 17 Նոյեմբեր 2015

Թուրքիայում 10 ժամում 5 երկրաշարժ է գրանցվել

Մարմարա ծովում երեկ 10 ժամվա ընթացքում 5 երկրաշարժ է գրանցվել: Ցնցումները զգացվել են Ստամբուլի տարբեր շրջաններում:

Բողազիչի համալսարանի սեյսմիկ հետազոտությունների ազգային կենտրոնի տվյալների համաձայն՝ առաջին 4.2 բալ ուժգնությամբ երկրաշարժը գրանցվել է տեղական ժամանակով ժամը 17:45-ին, որին հաջորդել են 3.1 և 3.4 բալ ուժգնությամբ հետցնցումները: Մյուս երկու ցնցումները գրանցվել են գիշերը ժամը 04:17-ին և այգաբացին՝ 06.36-ին, համապատասխանաբար 3.1 և 3.2 բալ ուժգնությամբ:

Ինչպես գրում է թուրքական «Milliyet» թերթը, Ստամբուլի նահանգապետ Վասիփ Շահինը հայտնել է, որ Մարմարա ծովում գրանցված ցնցումների հետևանքով մարդկային կորուստներ չեն եղել:

Ստամբուլի տեխնիկական համալսարանի դասախոս Օվգյուն Ահմեթ Էրջանը նշել է, որ մոտ շրջանում ավելի ուժգին երկրաշարժ չի սպասվում: Ըստ Էրջանի՝ Մարմարայի շրջանը 1999 թվականին տեղի ունեցած երկրաշարժից հետո բավականին լիցքաթափվել է, այդ պատճառով էլ մոտ ժամանակներս նոր երկրաշարժ չի սպասում: Սակայն, գիտնականը միևնույն ժամանակ նշում է, որ Ստամբուլում քաղաքային ձևափոխումները, որը ըստ իրեն բավականին ուշացած են, պետք է անհապաղ ավարտին հասցնել, հակառակ դեպքում հետևանքները ցավալի կլինեն:

Աղբյուր` Ermenihaber.am