Դավութօղլուն անդրադարձել է Սիլվանում 11 օր շարունակվող բախումներին

Տարածաշրջան14:20, 13 Նոյեմբեր 2015

Դավութօղլուն անդրադարձել է Սիլվանում 11 օր շարունակվող բախումներին

Թուրքիայի վարչապետ Ահմեթ Դավութօղլուն Կրոնական գործերի վարչություն կատարած աշխատանքային այցի ավարտին լրագրողների հետ ունեցած հարցուպատասխանի ժամանակ անդրադարձել է նաև Դիարբեքիր նահանգի Սիլվան շրջանում արդեն 11 օր շարունակվող բախումներին և հայտարարված պարետային ժամին:

Դավութօղլուն նշել է, որ «Թուրքիայի յուրաքանչյուր սանտիմետր քառակուսի տարածքի վրա հասարակական կարգ» հաստատելու համար իրականացվող գործողությունները շարունակվելու են»:

«Ոչ ոք թող չփորձի շոու կազմակերպել: Մենք գիտենք, թե Սիլվանում որտեղ և ինչպիսի կուտակումներ (ռազմական-խմբ.) են արվել: Թող ոչ ոք կասկածի տակ չդնի մեր վճռականությունը:

Մենք շարունակելու ենք այդ գործողությունները այնքան ժամանակ, մինչև որ Սիլվանում և մնացած բոլոր նահանգներում ու բնակավայրերում հանգստություն հաստատվի»,- հայտարարել է Դավութօղլուն:

Վերջինս ավելացրել է նաև, որ, Սիլվանում գործողությունները վերջնական փուլում են:

Նշենք, որ Թուրքիայի Դիարբեքիր նահանգի Սիլվան (պատմ.-Տիգրանակերտ) շրջանի 3 թաղամասերում արդեն 11 օր շարունակվում է ոստկանության կողմից «Քուրդիստանի բանվորական կուսակցության» (ՔԲԿ-PKK) զինյալների դեմ գործողություն անցկացնելու պատրվակով հայտարարած պարետային ժամը: 11 օրերի ընթացում կատաղի բախումներ են տեղի ունենում մի կողմից թուրքական ոստիկանության հատուկ նշանակության ու զինվորական ստորաբաժանումների, մյուս կողմից Սիլվանում կենտրոնացած ՔԲԿ-ի զինյալների ու կառույցի երիտասարդական թևի` YDG-H-ի անդամների միջև: Սիլվանի վերոնշյալ 3 թաղամասերի մոտ կուտակվել են ծանր ռազմական տեխնիկա, այդ թվում`տանկեր:

Աղբյուր` Ermenihaber.am