Դերասանուհի Սերրա Յըլմազ. «Այո, ես թուրք եմ, բայց դա իմ մեղքը չէ»:

Հասարակական10:46, 12 Նոյեմբեր 2015

Դերասանուհի Սերրա Յըլմազ. «Այո, ես թուրք եմ, բայց դա իմ մեղքը չէ»:

Ամերիկյան «Parts Unknown» հաղորդման շրջանակներում թուրքական ինքնության և Թուրքիայի հայերի մասին հնչած տեսակետներն ակտիվ քննարկումների առիթ են դարձել Թուրքիայում: Հաղորդման հեղինակ, հայտնի ամերիկացի խոհարար Էնթոնի Բուրդենը եթերում հյուրընկալել է թուրք դերասանուհի Սերրա Յըլմազին: Եթերի ընթացքում դերասանուհին ասել է. «Այո, ես թուրք եմ, բայց դա իմ մեղքը չէ»: Այս արտահայտությունը թուրքերի կողմից բուռն արձագանքի և քննադատությունների առիթ է հանդիսացել:

Իսկ թուրքական «Hurriyet» պարբերականի սյունակագիր Ջենգիզ Սեմերջիօղլուն նոյեմբերի 11-ի իր հոդվածում ուշադրություն է հրավիրել մեկ այլ հանգամանքի վրա: Սեմերջիօղլուն ընդգծել է, որ «CNN International»-ի նշված հաղորդման մեջ մեկ այլ, շատ ավելի կարևոր կարծիք է հնչել և հարկ է, որպեսզի այն ավելի մեծ ուշադրության արժանանա: Խոսքն այն մասին է, որ «Parts Unknown»-ի շրջանակներում Բուրդենը մի ստամբուլաբնակ հայ արհեստավորի հարցրել է, թե ինչպես է նա պատկերացնում հայերի ապագան Թուրքիայում: Այս հարցին Թուրքիայի հայ քաղաքացին պատասխանել է. «Եթե ամեն ինչ այսպես շարունակվի, շուտով Թուրքիայում ոչ մի հայ երիտասարդ չի մնա, բոլորը կթողնեն այս երկիրը, կհեռանան»:

Ըստ «Hurriyet»-ի թղթակցի՝ սա շատ ավելի կարևոր և մտածելու տեղիք տվող հանգամանք է, քան թուրք դերասանուհու արտահայտություն:

«Եթե որևէ իտալացի ասի, որ ինքն իտալացի է, բայց դա իր մեղքը չէ, բոլոր իտալացիները կծիծաղեն ու կանցնեն: Եթե ամերիկացին ասի, որ ինքն ամերիկացի է, բայց դրանում մեղք չունի, որևէ ամերիկացի դրան կարևորություն չի տա: Իսկ մենք անմիջապես այս միտքը մեկնաբանում ենք որպես թուրքերին ստորացնող արտահայտություն», - հավելել է Սեմերջիօղլուն:

Աղբյուր` Ermenihaber.am

Այս ենթաբաժնի վերջին նորությունները

17:38, 08 մայ

Թուրքիայում սոցցանցի ավելի քան 27.000 հաշիվ է արգելափակվել․

Արգելափակումների հիմնական պատճառները եղել են հասարակական կարգը խախտող, ահաբեկչություն քարոզող կամ տարածող, ինչպես նաև ատելության խոսք պարունակող գրառումները։