Դիարբեքիրում 8-օրյա բախումների հետևանքով 1 ոստիկան և 6 բնակիչ է զոհվել

Տարածաշրջան13:56, 10 Նոյեմբեր 2015

Դիարբեքիրում 8-օրյա բախումների հետևանքով 1 ոստիկան և 6 բնակիչ է զոհվել

Դիրաբեքիրի Սիլվան շրջանում, որի 3 թաղամասերում արդեն 8-րդ օրն է պարետային ժամ է հայտարարված, թուրք ուժայինները շարունակում են գործողություններ իրականացնել: Երկրում ահաբեկչական հայտարարված «Քուրդիստանի բանվորական կուսակցության» (PKK-ՔԲԿ) զինյալների դեմ իրականացված գործողությունների ընթացքում ավերվում են թաղամասերի բնակելի տներն ու զոհվում խաղաղ բնակիչներ:

«Milliyet» թերթի կայքը գրում է, որ գործողությունների ընթացքում տեղի ունեցող բախումների ընթացքում սպանվել է մեկ ոստիկան ու ևս 6 քաղաքացի` չհստակեցնելով վերջինների` խաղաղ բնակիչ լինել կամ չլինելու հանգամանքը:

Այսօր քրդամետ «Ժողովուրդների դեմոկրատական կուսակցության» (ԺԴԿ-HDP) պատգամավորներ Չաղլար Դեմիրելն ու Ֆելեքնազ Ուջան ցանկացել են մուտք գործել փողոց դուրս գալու արգելք սահմանված թաղամասեր, սակայն ոստիկանությունն արգելել է նրանց` պատճառաբանելով, որ այնտեղ բախումներ են տեղի ունենում:

Նշենք, որ Սիլվանի 3 թաղամասերում պարետային ժամ էր հայտարարվել ՔԲԿ-ականների փորած խրամատները լցնելու տեղադրած բարիկադները հեռացնելու պատրվակով ոստիկանական ուժերի և հատուկ տեխնիկայի շրջան մուտք գործելուց առաջ:

Աղբյուր` Ermenihaber.am