ERMENI HABER AJANSI

Թուրքիայում 2015թ. նոյեմբերի 1-ին տեղի ունեցած արտահերթ խորհրդարանական ընտրություններում «Գորշ գայլեր»-ի քաղաքական թևը համարվող «Ազգայնական շարժում կուսակցությունը» (ԱՇԿ-MHP) երկրի 81 նահանգներից 58-ում ձայն չի հավաքել՝ գրանցելով  0 տոկոս:

Թուրքական «gercekgundem» լրատվակայքը այս կուսակցության պարտությունը կապում է կուսակցապետի հետ՝ ստեղծված իրավիճակը բնորոշելով. «Ընտրողները ոչ ասացին Բահչելիին»:

Այսպես, եթե 2015թ. հունիսի 7-ի ընտրություններում MHP-ն անցողիկ պատգամավոր չուներ երկրի 32 նահանգներում, ապա այժմ կորցրեց 58 նահանգ: Եթե նախկինում հավաքել էր 16.4 տոկոս ձայն, ապա այժմ հավաքել է ընդամենը 12.03 տոկոս ձայն: Եթե նախկին ընտրություններում ԱՇԿ-ին ձայն էր տվել 7մլն 519 հզ մարդ, ապա այս անգամ կորցրել է ավելի քան 2 մլն ձայն, ինչի արդյունքում կուսակցության պատգամավորների թիվը նախկին 80-ից նվազել է 41-ի: Նույնիսկ այն նահանգներում (թվով 9), որտեղ հունիսի 7-ին առաջին անգամ հաղթել էին MHP-ի առաջադրած թեկնածուները, այս այնգամ այդ նահանգներում  ևս կուսակցությունը զրո է ստացել:

Հիշեցնենք, որ նախնական տվյալներով՝ 

Իշխանական «Արդարություն և զարգացում» կուսակցություն (ԱԶԿ-AKP) – 49.04 տոկոս (316 պատգամավոր)

Ընդդիմադիր «Ժողովրդահանրապետական» կուսակցություն (ԺՀԿ-CHP) – 25.4 տոկոս (134 պատգամավոր)

Ընդդիմադիր «Ազգայնական շարժում կուսակցություն» (ԱՇԿ-MHP) – 11.9 տոկոս (41 պատգամավոր)

Քրդամետ «Ժողովուրդների դեմոկրատական կուսակցություն» (ԺԴԿ-HDP) – 10.7 տոկոս (59 պատգամավոր)

Թուրքիայի ազգային մեծ ժողովը (ԹԱՄԺ-TBMM) միապալատ խորհրդարան է՝ կազմված 550 պատգամավորական աթոռից: Միակուսակցական կառավարություն կազմելու համար հավակնորդ քաղաքական ուժին անհրաժեշտ է խորհրդարանում ունենալ առնվազն 276 պատգամավոր: