ERMENI HABER AJANSI

Գյուլենական համայնքի ներկայացուցիչները սկսած 2009 թվականից 6 անգամ հանդիպել են «Քուրդիստանի բանվորական կուսակցության» (ՔԲԿ-PKK) անդամների հետ: Այս մասին գրում է «Yenisafak» թերթը, տեղեկացնելով, որ առաջին հանդիպումը տեղի է ունեցել, երբ քրդերի առաջնորդ  Աբդուլլահ Օջալանի հետ  բանակցություների արձանագրությունները հայտնվել են մամուլում: Գյուլենական համայնքի ներկայացուցիչ Հյուսիսային Իրաքի իմամ Թալիփ Բյույուքի հրավերով  Էրբիլ քաղաքում կայացած հանդիպմանը մասնակցել են  քրդական «Խաղաղություն և ժողովրդավարություն» կուսակցության (BDP-ԽԺԿ) ներկայացուցիչները և Քանդիլի ՔԲԿ-ի ղեկավարները:

Ըստ թերթի՝ այդ հանդիպմանը ԽԺԿ-ի կողմից մասնակցել է Ահմեթ Թյուրքը, Այսել Թուղլուքը, Ալթան Թանը, Ջեմալ Ջոշքունը, PKK-ի կողմից Սաբրի Օքը, Մուստաֆա Քարասուն, գյուլենական համայնքի կողմից բացի Թալիփ Բյույուքից, հանդիպմանը մասնակցել են Ջեմալ Բուլութը և մի լրագրող:

2-րդ հանդիպումը տեղի է ունեցել առաջինից 46 օր հետո, 3-րդը՝ տեղի է ունեցել Եվրոպայում, 4-րդը և 5-րդը՝ կրկին Էրբիլում:

Թերթը գրում է, որ գյուլենական համայնքը PKK-ի վստահությունը շահելու համար վերջին հանդիպման ժամանակ կառույցին է փոխանցել  «Քուրդիստանի համայնքների միության» դեմ իրականացված գործողությունների ժամանակ ձերբակալված, այնուհետև վկաների պաշտպանության ծրագրի մեջ ներգրավված անձանց տվյալները: Նշվում է, որ այդ մարդիկ, որոնց տվյալները փոխանցվել էին PKK-ին, վերջինի և «Քուրդիստանի համայնքների միության» մասին կարևոր տեղեկություններ հայտնել իշխանություններին: Ինչպես տեղեկացնում է իշխանամետ «Sabah» պարբերականը, ՔԲԿ-ն այդ անձանց վերացրել է:

Բացի այս, նշվում է, որ գյուլենական համայքը հոգացել է ՔԲԿ-ի ղեկավարների  բուժման ծախսերը:

«Sabah»-ի տեղեկացմամբ գյուլենական համայնքը ՔԲԿ-ին 25 միլիոն դոլարի օգնություն է ցուցաբերել:

Նշենք, որ գյուլենական կոչվող իսլամական վերոնշյալ շարժումը (համայնք) գլխավորում է ամերիկաբնակ թուրք միլիարդատեր Ֆեթուլլահ Գյուլենը: Շարժումն ունի հարյուրավոր դպրոցներ աշխարհի բազմաթիվ մահմեդական երկրներում: Այդ դպրոցները  ինչպես համայնքի գաղափարների տարածման հիմնական օջախն են, այնպես էլ վերջինիս եկամուտների ապահովման աղբյուրն են:

Գյուլենականները համարվել են Թուրքիայում իշխող «Արդարություն և զարգացում» կուսակցության քաղաքական հենարանը մինչև 2013 թվականի դեկտեմբերի 17-ը, երբ Թուրքիայում իրկանացված հակակոռուպցիոն խոշոր օպերացիան ի ցույց դրեց իշխանությունների և գյուլենական համայքնի միջև առկա հակամարտությունը: Շարժումը քարոզում է իսլամական չափավորություն, հանդուրժողականություն, միջկրոնական երկխոսութուն, իսլամի և ժողովրդավարության համատեղելիություն: