Թուրքիայում հրապարակվել են ընտրությունների թեմայով վերջին սոցհարցումների արդյունքները

Հասարակական10:28, 07 Հոկտեմբեր 2015

Թուրքիայում հրապարակվել են ընտրությունների թեմայով վերջին սոցհարցումների արդյունքները

Սոցիոլոգիական ուսումնասիրություններ իրականացնող թուրքական «ANDY-AR» կազմակերպությունը, որի` Թուրքիայում տեղի ունեցած վերջին 5 ընտրություններից առաջ իրականացրած հարցումների արդյունքներն ամենամոտն են եղել իրական պատկերին, հրապարակել է իր անցկացրած վերջին հարցումների արդյունքները:

Ըստ թուրքական «Milliyet» թերթի կայքի` «Ո՞ր կուսակցությանն եք տալիս ձեր քվեն» հարցին հարցվածների 14.7%-ը պատասխանել է, որ դեռ չի կողմնորոշվել: Իսկ կողմնորոշվածների 42.6%-ը պատրաստվում է իր ձայնը տալ կառավարող «Արդարություն և զարգացում կուսակցությանը» (AKP-ԱԶԿ), ինչը 1.5%-ով բարձր է հունիսի 7-ին տեղի ունեցած խորհրդարանական ընտրությունների ժամանակ կուսակցության գրանցած ցուցանիշից (40.9%):

Մոտ 2%-անոց աճ է նկատվել հունիսի 7-ին խորհրդարանական ընտրություններին 25% ձայն հավաքած գլխավոր ընդդիմադիր «Ժողովրդահանրապետական կուսակցությունը» (CHP-ԺՀԿ)` ստանալով 2% ընտրողների նախնական քվեները:

Քվեների նվազում է գրանցվել հունիսի 7-ի ընտրություններին 16.3% ձայն հավաքած ընդդիմադիր «Ազգայնական շարժում կուսակցությունը» (MHP-ԱՇԿ)`15.2 %:

Իսկ քրդամետ «Ժողովուրդների դեմոկրատական կուսակցությունը» (HDP-ԺԴԿ) վերջին ընտրությունների արդյունքների համեմատ 1 տոկոսանոց կորուստ է գրանցել`ստանալով ընտրողների նախնական քվեների 12.1%-ը:

Կազմակերպությունը մեկ այլ հետաքրքիր վիճակագրություն էլ է ներկայացրել, ըստ որի բարձրագույն կրթություն ունեցող ընտրողների 41.1%-ն իր ձայնը տալիս է ԺԴԿ-ին, 36.4%-ը ԱՇԿ-ին, 35%-ը ԺՀԿ-ին, իսկ 20.7%-ը ԱԶԿ-ին:

Հարցումների արդյունքների մեջ նշվում է նաև, որ չկողմնորոշված ընտրազանգվածն ավելի շատ հարում է ԱԶԿ-ին:

«ANDY-AR»-ի գլխավոր տնօրեն Ֆարուք Աջարը հարցման արդյունքների մասին հայտարարության մեջ նշել է, որ ստացված արդյունքները ցույց են տալիս, որ ԱԶԿ-ն ունենալու է 265-268 պատգամավոր և չի կարողանալու միակուսակցական կառավարություն ձևավորել: Բայց միևնույն ժամանակ ընտրողների որոշակի միտում կա հարել դեպի ԱԶԿ: Մինչև ընտրության օրը չի բացառվում, որ կուսակցության համար այնքան քվեներ ապահովվեն, որպեսզի ԱԶԿ-ն կարողանա միակուսակցական կառավարություն ձևավորել:

Աղբյուր` Ermenihaber.am